30.04.2024 | 23:59
Ժիրայր Սեֆիլյանն ազատ է արձակվել
-2 աստիճան և ցրտահարություն Շիրակի մարզում. վնասվել են կարտոֆիլի ու հնդկաձավարի ցանքատարածությունները. ԼՈՒՍԱՆԿԱՐՆԵՐ
03.07.2019 | 17:04
Շիրակի մարզում չորս ուժեղ կարկտահարությունից հետո հիմա էլ ցրտահարության դեպքեր են գրանցվել։ Նախօրեին մարզի Աշոցքի տարածաշրջանում գիշերը ջերմաստիճանը հասել է 0 աստիճանի։ Ցրտահարությունից հիմնականում տուժել են տարածաշրջանի Բավրա, Կրասար, Թավշուտ, Սիզավետ գյուղական համայնքները։
Factor.am-ի հետ զրույցում Աշոցք համայնքի ղեկավար Կարեն Մանուկյանը տեղեկացրեց, որ մեծապես տուժել են հնդկաձավարի և կարտոֆիլի ցանքատարածությունները։
Առավել տուժած Բավրա գյուղում գիշերը ջերմաստիճանը տատանվել է -1-2-ի սահմաններում՝ ցրտահարելով հնդկաձավարի ու կարտոֆիլի ցանքերը, վնասել տնամերձ այգիները։
«Հնդկաձավար ունեինք ցանած 6 հա, ցրտահարությունից լրիվ ոչնչացավ, սառեցրել է, թուփը լրիվ ոչնչացրել։ Մեկ էլ կարտոֆիլի թփերն է սևացրել։ Կարտոֆիլը դեռ հնարավոր է, ոչ լրիվ, բայց վերականգնվի, իսկ հնդակաձավարը՝ ոչ»,- մեզ հետ զրույցում ասաց Բավրայի վարչական ղեկավար Պավլիկ Սումբուլյանը։ Ի դեպ՝ Բավրան Հայաստանի բացառիկ շրջաններից է, որտեղ հնդկաձավար է աճեցվում։
Բավրայում հնդկաձավարի ցանքատարածությունները վնասվել էին նաև կարկուտից։ «Կարկուտից էլ էլի հնդկաձավարին էր շատ վնաս եղել։ Հնդկաձավարին արդեն երկրորդ հարվածն է, հիմա էլ՝ այս ցրտահարությունը»,- ասաց Բավրայի վարչական ղեկավարը։
Գյուղացիները տեղյակ են եղել սպասվելիք հնարավոր ցրտահարության մասին, միջոցներ ձեռնարկել են, բայց՝ անօգուտ։
«Տեղեկացված են եղել, փորձել են տարբեր միջոցներ ձեռնարկել, որոշակի միջոցներ կիրառվել են, բայց ապարդյուն»,- ասաց Աշոցքի համայնքապետ Կարեն Մանուկյանը։
Հիմա տուժած համայնքներում աշխատում են հանձնաժողովները, ճշտում վնասի չափը՝ տվյալները Շիրակի մարզպետարան ներկայացնելու համար։
Էմմա Չոբանյան
