Քաղաքականություն
03.07.2019 | 12:30Հունիսի 30-ից հուլիսի 10-ը Բաքվում անցկացվում է ՅՈՒՆԵՍԿՕ-ի համաշխարհային ժառանգության կոմիտեի 43-րդ նիստը, որին, որպես դիտորդ, մասնակցելու հրավեր, ի շարս այլ պետությունների, ապրիլին ստացել էր նաև Հայաստանի պատվիրակությունը։ Այսօր հրավիրված ճեպազրույցում այս մասին տեղեկացրեց ՀՀ ԱԳՆ խոսնակ Աննա Նաղդալյանը:
«Հայկական կողմը դիմել էր ՅՈՒՆԵՍԿՕ-ի կողմին՝ հյուրընկալող պետությունից ստանալու անվտանգության համապատասխան հավելյալ միջոցներ ՀՀ պատվիրակության մասնակցության համար՝ հաշվի առնելով ՀՀ քաղաքացիների և, ընդհանրապես, ազգությամբ հայերի՝ այդ երկիր մուտքի հետ կապված անհնարինությունը և այդ երկրում ամենօրյա ռեժիմով իրականացվող հակահայկական քարոզը»,- նշեց նա:
Հայկական կողմը, ըստ Նաղդալյանի, մշտական կապի մեջ է եղել ՅՈՒՆԵՍԿՕ-ի քարտուղարության հետ ու ջանքեր են գործադրվել՝ հայկական կողմի համար հյուրընկալող կողմից անհրաժեշտ երաշխիքներ ստանալու նպատակով։
«Սակայն, ի հեճուկս գործադրված ջանքերի, միջոցառումից երկու օր առաջ՝ հունիսի 28-ին հայկական պատվիրակությունը ստացել է ՅՈՒՆԵՍԿՕ-ի գլխավոր քարտուղարի տեղակալի նամակը, որում Ադրբեջանը հրաժարվել է տրամադրել գրավոր հավելյալ անվտանգության միջոցառումներ՝ ՀՀ պատվիրակության անարգելք մուտքը երկիր ու մասնակցությունը միջոցառմանն ապահովելու համար»,- ասաց ԱԳՆ խոսնակը:
Նա հավելեց, որ Հայաստանը պաշտոնական բողոք է հղել ՅՈՒՆԵՍԿՕ-ի ղեկավարութանն ու անդամ պետություններին՝ կոչ անելով ուշադրություն հրավիրել այս արատավոր գործելաոճի վրա ու հանդես գալ դատապարտող դիրքորոշմամբ:
Մանրամասները՝ տեսանյութում:
