Սամբոյի և ձյուդոյի մարզադպրոցի շենքն իր հարակից տարածքով կվաճառվի․ տեղում կկառուցվի հյուրանոց

Կառավարության հունիսի 27-ի նիստում գործադիրը հավանություն տվեց որոշման նախագծի, որով առաջարկվում է Պետական գույքի կառավարման կոմիտեին ամրացված «Սամբոյի և ձյուդոյի օլիմպիական մանկապատանեկան մարզադպրոց» ՊՈԱԿ-ին անհատույց օգտագործման իրավունքով տրամադրված շենք-շինություններն ու հողամասը վաճառել «Ատլանտ Գրուպ» սահմանափակ պատասխանատվությամբ ընկերությանը:

Համապատասխան որոշման նախագիծը Կառավարության համաձայնությանը ներկայացրեց Տարածքային կառավարման և ենթակառուցվածքների նախարար Սուրեն Պապիկյանը:

««Ատլանտ Գրուպ» ՍՊԸ-ն 5 մլրդ դրամի ներդրումային ծրագիր է ներկայացնում, ըստ որի՝ առաջարկում է Պետական գույքի կառավարման կոմիտեին ամրացված և «Սամբոյի և ձյուդոյի օլիմպիական մանկապատանեկան մարզադպրոց» ՊՈԱԿ-ին անհատույց օգտագործման իրավունքով տրամադրված Երևան քաղաքի Նար-Դոս փողոցի 53/2 հասցեում գտնվող 1039.1 քմ մակերեսով շենք-շինությունները, և դրանց օգտագործման ու սպասարկման համար հատկացված 0.11348 հա մակերեսով հողամասը հետ վերցնել և ուղղակի վաճառքի ձևով օտարել «Ատլանտ Գրուպ» ՍՊԸ-ին»,- նախագիծը ներկայացրեց նախարարը՝ նշելով, որ այդ վայրում կառուցվելու է հյուրանոց։

«Ընկերության կողմից ներկայացվել է ներդրումային գործարար ծրագիր, համաձայն որի, ընկերության կողմից արդեն իսկ ձեռք բերված տարածքում նախատեսվում է մինչև 2021 թվականի օգոստոս ամիսը կառուցել նոր գույքային համալիր, որի նպատակով կներդրվի շուրջ 5 000 000 000 ՀՀ դրամ, որից 1 440 000 000 դրամը բաժին կընկնի օտարման ներկայացվող տարածքում կատարվող ներդրումներին»,- ասաց նա։