«Մի ուրախացնող բան կա, որ մեր իշխանությունը բացահայտ հակադրվում է ռուսական գծին». Անուշ Սեդրակյանը՝ Ռոբերտ Քոչարյանի կալանավորման մասին. ՏԵՍԱՆՅՈՒԹ

ՀՀ Վերաքննիչ քրեական դատարանն այսօր երկրորդ նախագահ Ռոբերտ Քոչարյանին կալանավորելու որոշում կայացրեց ու Քոչարյանը կրկին վերադարձավ ԱԱԾ մեկուսարան։

Քաղաքական վերլուծաբան Անուշ Սեդրակյանը Factor.am-ի հետ զրույցում անդրադառնալով հարցին, որ Ռոբերտ Քոչարյանն ու նրա պաշտպանական խումբը նախապես հայտարարել էին, թե չեն մասնակցելու դատական նիստին, քանի որ իրենց հնարավորություն չի տրվել հակափաստարկներ ներկայացնել, ասաց. «Կարծում եմ, որ Քոչարյանն ու իր թիմը վերցնելու են այս դատական գործընթացի ոչ օրենսդրական լինելու թեզը և մինչև վերջ առաջ են տանելու, որովհետև ուրիշ տարբերակ չունեն։ Մտածում եմ՝ որոշումը կայացնելուց հետո դատավորը հաստատ ունի իր հակափաստարկները, որը կօգնի այս վճիռը պահել անխախտ»:

Սեդրակյանը չի կարծում, որ այս որոշմամբ Քոչարյանի կալանքի շուրջ դատական քաշքշուկն ավարտվեց: «Ես կարծում եմ, որ իրավական քաշքշուկը դեռ երկար է տևելու և դրա հետ մեկտեղ քաղաքական լարվածությունը։ Սկսելու են գործել տարբեր բողոքարկման մեխանիզմներ՝ ընդհուպ մինչև Եվրոպական դատարան։ Ինձ համար մի ուրախացնող բան կա այս ամենի մեջ, որ մեր իշխանությունները բացահայտ հակադրվում են ռուսական գծին»,- ասաց Սեդրակյանը։

Նրա խոսքով՝ հայ-ռուսական հարաբերությունները ոչ թե ընթանում են դեպի վատթարացում, այլ այն ուղղությամբ, որ ռուսները իրավունք չունեն միջամտել Հայաստանի ներքին խնդիրներին։

«Եթե կան իրավական հարցեր, դրա համար կա Եվրոպական դատարան, կա Հաագա, թող գնան, այնտեղ լուծեն։ Ի՞նչ գործ ունեն այլ երկրի նախագահը և դեսպանը Հայաստանում տեղի ունեցող դատական պրոցեսի հետ»,- հարց ուղղեց քաղաքագետը:

Անդրադառնալով ԵԽԽՎ-ում ՌԴ-ի ձայնի իրավունքի հարցով հայկական պատվիրակության քվեարկությանը՝ Սեդրակյանն ասաց. «Եթե արդեն դու դեմ ես եղել, ուրեմն դու դեմ ես։ Տեխնիկական սխալ, կարծում եմ, չի կարող լինել։ Եթե քո պատվիրակության ներսում տարակարծություն կա, նշանակում է՝ դու ժողովրդավար ես։ Հիասթափեցնող էր Էդմոն Մարուքյանի «կողմ» քվեարկությունը։ Ինչ վերաբերում է Իգիթյանի չմասնակցելուն, կարծում եմ, որ դա դիվանագիտական ճիշտ որոշում էր։ Բավական մեծ թվով պատգամավորներ ուղղակի չեն մասնակցել»։

Նշենք, որ «Իմ քայլի» պատգամավորները չեն մասնակցել ԵԽԽՎ-ում Ռուսաստանի ձայնի վերականգնման քվեարկությանը, իսկ պատվիրակության ղեկավար Ռուբեն Ռուբինյանը դեմ է քվերակել, հետո դահլիճում հայտարարել, որ սխալվել է:

«Մերձեցման երեկոն ոչինչ չի փոխելու։ Ավելի լավ կլիներ, որ ասեր, թե մեր մի անդամը գերսկզբունքային է։ Եթե դու ներքին հարցերում սկսել ես անջրպետ դնել, դա պետք է շարունակվի նաև արտաքին աշխարհում, որ արտաքին աշխարհը հասկանա, որ դու Ռուսաստանի կցորդը չես թեկուզ քվեարկության մեջ»,- նշեց Սեդրակյանը՝ հավելելով, որ Ռուբինյանի դիրքորոշման փոփոխությանը, իր կարծիքով, միջամտել են և՛ Ռուսաստանի, և՛ Հայաստանի իշխանությունները։

Ռուս-վրացական հարաբերությունների վատթարացման առիթով քաղաքագետն ասաց, որ Վրաստանում արմատական ու կոշտ են տրամադրված Ռուսաստանի հետ հարաբերություններում։ Վերջին օրերին իր այցի ընթացքում չի գտել մեկին, որը կասեր՝ իրենք առանց ռուսի կկործանվեն:

Հարցազրույցն ամբողջությամբ՝ տեսանյութում:

Մարինե Խառատյան