18.09.2026 | 07:58
Փաշինյանն աշխատանքային այցով մեկնել է Գերմանիա․ նրան կշնորհվի Հեսսեյան Խաղաղության մրցանակը
Կոչ ենք անում Չինաստանի կառավարությանը դադարեցնել շների սպանդը. Արտյոմ Վարդանյան. ՏԵՍԱՆՅՈՒԹ
24.06.2019 | 12:38
«Մենք Չինաստանի ու չինական կառավարության դեմ չենք, պարզապես ուզում ենք հորդորել, որպեսզի արգելեն այդ դաժան փառատոնը, որի ընթացքում հարյուր հազարավոր շներ են մորթվում»,- այս մասին այսօր Չինաստանի դեսպանատան մոտ չինական «Yulin Dog Meat» շների փառատոնի դեմ բողոքի ակցիայի ընթացքում նշեց «Ջամբո» էկզոտիկ այգու հիմնադիր Արտյոմ Վարդանյանը։
«Այս փառատոնի ժամանակ Չինաստանում հարյուր հազարավոր շների են դաժանաբար մորթում և ուտում։ Սա մի փոքր կաթիլ է, բայց հուսով ենք՝ արձագանք կունենա և կկարողանանք այնպես անել, որ դադարեցնեն այդ դաժան ավանդույթը»,- Factor.am-ի հետ զրույցում նշեց Արտյոմ Վարդանյանը։
Հայաստանում չինական փառատոնի դեմ սա առաջին բողոքի ակցիան է։ Մասնակիցների խոսքով՝ պատրաստվում են Հայաստանում Չինաստանի դեսպանին նամակ գրել՝ հորդորելով Հայաստանի մի խումբ քաղաքացիների դիրքորոշումը հասցնել չինական կառավարությանը և քայլեր ձեռնարկել՝ ուղղված փառատոնի դադարեցմանը։
Նշենք, որ չինական Յուլին քաղաքում շան մսի ամենամյա փառատոնը մեկնարկել է հունիսի 21-ին և տևելու է մինչև հունիսի 30-ը։
Մանրամասները՝ տեսանյութում:
Նելլի Մելքոնյան
