10.09.2026 | 18:23
COP17-ի համար նոր ենթակայան է կառուցվում, գործողը՝ վերազինվում
Իշխանության ղեկին են գտնվում մարդիկ, որոնք 1937 թվականի ոգով են ապրում. իրավապաշտպան
Հասարակություն
11.09.2017 | 19:55
Երևանի Հովհաննես Թումանյանի թանգարանում օգոստոսին ներկայացվեց «Խավարում» խորագրով ցուցադրությունը, որը նվիրված էր բոլշևիկյան բռնաճնշումների հայ զոհերի հիշատակին։ Վերջիններիս թվում են նաև ամենայն հայոց բանաստեղծի երեք որդիները: Ցուցադրությունը, սակայն, որը նախատեսված էր ներկայացնել մինչև ուշ աշուն, փակվել է։
Factor.am-ի հարցին, թե ով է կարգադրել, որպեսզի ցուցադրությունը հանվի, տիկին Թուխիկյանը պատասխանեց՝ իր գործատուն՝ Մշակույթի նախարարությունը: «Զրպարտության հետևանքով ստիպված եղանք հավաքել ցուցադրությունը։ Որոշ մարդիկ դիմել են որոշակի կառույցների և, ենթադրում եմ, որպեսզի գործը գլուխ գա, դիմել են շանտաժի»,- ասաց նա։
Factor.am-ը թեմայի շուրջ զրուցել է իրավապաշտպան Վարդան Հարությունյանի հետ: «Ինձ շատ ուրախացրեց, այն, որ նման ցուցահանդես է կազմակերպվել, կատակով կարելի էր մտածել, որ այն ինչ-որ մեկի դուրը կարող էր չգալ, բայց լրջորեն մտածել, որ վերին օղակներում կարող են նման ցուցահանդես փակել, 21-րդ դարի մեր օրերում աներևակայելի էր։ Նույնիսկ ընկերներիցս մեկն ասաց՝ պատկերացնո՞ւմ եք ինչ լավ կանեն, որ փակեն․ միանգամից իրենց դեմքը ցույց կտան, ես ասացի, որ դա հնարավոր չէ, որովհետև մենք բոլորովին ուրիշ ժամանակներում ենք ապրում: Փաստորեն, փակեցին»,- նշեց մեր զրուցակիցը։
Նրա խոսքով՝ մենք խորհրդային շրջանի բարքերի կրողն ենք, այդ է պատճառը, որ մեր երկրում նման իրադարձություններ են տեղի ունենում. «Մենք խորհրդային բեռով եկել ենք 21-րդ դար։ Իշխանության ղեկին են գտնվում մարդիկ, որոնք 1937 թվականի ոգով են ապրում, այդ ոգով դաստիարակվել են, այդ միտքը, ապրելակերպը ներդրել են մեր իրականություն: Եվ զարմանալի չէ, որ մեր հասարակության քիչ մասը գիտի, որ Երևանում եղել է նման ցուցահանդես ու փակվել է, այնքան ոչ նշանակալի է դա, որ մարդիկ չգիտեն ո՛չ բացման, ո՛չ փակման մասին»։
Մանրամասները՝ տեսանյութում։
Աննա Բաբաջանյան
