19.04.2026 | 23:45
Գետերում նկատվում է ջրի մակարդակի բարձրացում. ՆԳՆ ՓԾ-ն անցել է ուժեղացված ծառայության
Գյումրիի «Սասստեքսի» դռները վերջապես բացվել են աշխատողների առաջ. հարկադիր պարապուրդից հետո այսօր վերսկսել են աշխատել
Տնտեսություն
21.06.2019 | 14:24
Այսօր Գյումրիի «Սասստեքս» կարի արտադրամասի դռները, երեքշաբթի ձեռք բերված պայմանավորվածության համաձայն, վերջապես բացվել են և աշխատակիցներին ներս են թողել: Շուրջ մեկ ամիս տևած հարկադիր պարապուրդից հետո աշխատակիցներին թույլ են տվել աշխատել: Թե ի՞նչ պայմաններով են աշխատողները շարունակելու աշխատել, նրանց կողմից բարձրացված խնդիրները լուծվե՞լ են, թե՞ ոչ, դեռ պարզ չէ։
«Այսօր «Սասստեքսի» աշխատողները գնացել են աշխատանքի, ներս են թողել, որ աշխատեն։ Այսօր ոնց որ խնդիր չի եղել: Չեմ կարող ասել՝ անցել են նորմալ աշխատանքային ռեժիմի՞, թե՞ ոչ, բայց, համենայն դեպս, այսօր աշխատում են: Օրվա վերջում ամեն ինչ պարզ կլինի։ Աշխատողներին ես խնդրել եմ, որ օրվա վերջում մոտենան ինձ, որպեսզի կարողանանք պարզել՝ ինչ է տեղի ունեցել»,- Factor.am-ի հետ զրույցում ասաց Շիրակի փոխմարզպետ Վարդան Գրիգորյանը։
Փոխմարզպետը նշեց, որ մանրամասներին չի տիրապետում, աշխատողները միայն զանգել են ու ասել, որ աշխատավայրում են ու աշխատում են։
Նշենք, որ ապրիլի՝ կիսատ վճարված աշխատավարձին ավելացել է նաև մայիսի չվճարված աշխատավարձը: Աշխատավարձերի վճարման հարցում ևս դեռ հստակություն չկա:
«Մայիսի աշխատավարձի հետ կապված էլ նորություն չկա, տեղեկություն չեն փոխանցել։ Ինչ-որ ասել են, որ պատրաստվում են աշխատավարձը փոխանցել։ Ոչ հստակ պատասխան են տվել։ Համենայն դեպս, ինձ թվում է, որ կփոխանցեն հաշվարկային աշխատավարձը, իրենց բանաձևով ինչ-որ հաշվել են»,- ասաց Վարդան Գրիգորյանը։
Հավելենք, որ «Սասստեքս» կարի արտադրամասում հունիսի 12-ից սկսված տեսչական ստուգումների արդյունքներն ամփոփվելու են այսօր:
«Տեսչական մարմնի ներկայացուցիչները մի օր են եկել, 2-րդ անգամ գալը հետաձգեցին: Այսօր ժամկետն ավարտվում է, արդյունքը պիտի ներկայացնեն»,- ասաց Շիրակի փոխմարզպետը՝ հավելելով, որ օրվա ավարտին՝ արտադրամասի աշխատողների հետ հանդիպումից հետո, արդեն հստակ տեղեկություններ կլինեն:
Հիշեցնենք, որ մայիսի 29-ից Գյումրիի «Սասստեքս» կարի արտադրամասի աշխատողները բողոքում են աշխատանքային վատ պայմաններից և պահանջում վճարել իրենց ապրիլի ամբողջական՝ 55.000 դրամ և մայիսի աշխատավարձերը։
Էմմա Չոբանյան
