Կուզեի՝ պարոն Բաղդասարյանը հիմքեր հրապարակեր, ոչ թե բամբասեր. Մանե Թանդիլյանի պատասխանը՝ Վահրամ Բաղդասարյանին

Ազգային ժողովի «Ելք» խմբակցության պատգամավոր Մանե Թանդիլյանը հայտարարում է՝ դաշինքի համար նորություն չէ, որ խորհրդարանական ուժերը չեն աջակցելու ԵՏՄ-ից դուրս գալու իրենց նախաձեռնությանը:

«Միամտություն է կարծել, թե մենք չէինք հասկանում, որ Հանրապետականը, «Ծառուկյան» դաշինքը և մի շարք այլ ուժեր, որոնք ներկայացված չեն Ազգային ժողովում, դեմ են լինելու: Սա մեզ համար ոչ անակնկալ է, ոչ էլ նորություն»,- Factor.am-ի հետ զրույցում հայտարարեց ընդդիմադիր դաշինքի պատգամավորը` ընդգծելով, որ այդուհանդերձ, հարցը բարձրաձայնելը և հանրությանն իրենց փաստարկները ներկայացնելը կարևոր է:

«Միևնույն ժամանակ մենք ուզում ենք շեշտադրել, որ Եվրամիության հետ ասոցացման պայմանագիրը և դրանից հրաժարումը բավականաչափ հանրային քննարկման չարժանացան: Ըստ էության, հանրությունը չհասկացավ՝ մենք ինչից ենք հրաժարվել ԵՏՄ մտելու համար»,- շարունակեց պատգամավորը:

Ինչ վերաբերում ՀՀԿ խմբակցության ղեկավար Վահրամ Բաղդասարյանի հայտարարությանը, որ նախագիծը բովանդակային առումով թույլ է, «Ելք»-ը որոշակի պայմանավորվածություն ունի և դրա համար է նման նախաձեռնությամբ հանդես գալիս, Թանդիլյանն արձագանքեց. «Ես կուզեի, որ պարոն Բաղդասարյանը հիմքեր և փաստեր հրապարակեր, այլ ոչ թե բամբասեր: Ես համոզված եմ, որ սա իր եզրակացությունն է, քանի որ անպատասխանատու հայտարարություններ անելը շատ տարածված է, պարոն Բաղդասարյանը օգտվում է այդ հնարավորությունից»:

Ավելի վաղ, Factor.am-ի հետ զրույցում խորհրդարանական մեծամասնության ղեկավարն ընդգծել էր` երբ նախագիծը պաշտոնապես դրվի շրջանառության մեջ, իրենք ներկայացված բոլոր փաստարկներին կպատասխանեն:

Հարցազրույցն ամբողջությամբ՝ տեսանյութում:

Շողիկ Գալստյան