«Կինոյում հեղափոխությունը սկսվել էր թավշյա հեղափոխությունից շատ ավելի առաջ». Արամ Շահբազյան. ՏԵՍԱՆՅՈՒԹ

Factor.am-ի հարցազրույցը կինոռեժիսոր Արամ Շահբազյանի հետ

– Պարո՛ն Շահբազյան, ինչպե՞ս եք գնահատում հեղափոխության մեկ տարին:

– Բավական դրական: Կա շատ թեթև աուրա, որը մարդկանց ավելի ազատ կողմնորոշվելու և մտածելու հնարավորություն է տալիս, ինչն ինձ համար ամենակարևորն է:

– Ձեր կարծիքով՝ ինչո՞ւ, այնուամենայնիվ, դա հնարավոր դարձավ:

– Իմ կարծիքով՝ բաժակն ուղղակի լցվել էր, դրա արդյունքում հնարավոր դարձավ: Բոլոր աստիճաններում և բոլոր իրավիճակներում գործում էր կոռուպցիոն, ծանոթի, զանգերով հարց լուծելու գործոնը:

– Ինքներդ բախվե՞լ եք այդպիսի վիճակների:

– Անընդհատ եմ բախվել նման վիճակների՝ տարբեր համակարգերում:

– Հեղափոխության առաջին արդյունքներից մեկը Մշակույթի նախարարության միավորումն էր Կրթության նախարարությանը: Դուք երբևէ զգացե՞լ եք, որ Մշակույթի նախարարությունն ինքն իրենով, առանձին պետական մարմին է:

– Ես դրա մասին բարձրաձայնել եմ մինչև միացումը: Կարծում եմ, որ Մշակույթի նախարարությունը որպես առանձին կառույց պետք է հանդես գա, որովհետև կային շատ ու շատ կանոնակարգեր, շատ օրենքներ՝ կապված մշակութային ժառանգության, արտադրանքի հետ, որոնք պետք է լուծվեին, և ես կոչ էի անում, որպեսզի այս գործընթացը հետաձգեին որոշ ժամանակ՝ մինչև քիչ թե շատ կարևոր քայլերն արված կլինեին: Դրանից հետո նոր կարող էին նման միավորման գնալ:

– Հիմա, ըստ Ձեզ, մենք խնդիրնե՞ր ենք ունենալու:

– Ոչ թե խնդիրներ ենք ունենալու… ես այն ժամանակ էլ եմ ասել՝ ինչ է տեղի ունենալու, որոշակի պրոցեսներ նորից սկսվելու են զրոյականից: Պաշտոնյաներ են փոխվում, և որոշակի գործընթացներ ուղղակի դանդաղում են: Սա է խնդիրը: Դրա համար ես ասում էի, որ, այսպես ասած, տեմպի մեջ կարելի է քայլեր անել, որից հետո նոր միավորել:

– Պարո՛ն Շահբազյան, Ձեր կարծիքով՝ կինոյում այսօր հեղափոխական փոփոխություններ պե՞տք են:

– Կինոյում թավշյա հեղափոխությունից շատ ավելի առաջ էր սկսվել հեղափոխական իրավիճակը, որովհետև կամայականությունը դարձել էր ուղղակի կինոյի հստակ գործընթաց՝ կամայականությունը, «վերևից» զանգելը… Կինոգործիչների մոտ արդեն հեղափոխական այն իրավիճակն էր, որ այլևս վերին խավերը չեն կարող կառավարել հին ձևով, իսկ կինոգործիչները չեն կարող արդեն շարունակել հին ձևով: Եվ այդ հեղափոխական գործընթացն արդեն սկսված էր, երբ տեղի ունեցավ թավշյա հեղափոխությունը: Այսինքն՝ մենք Կինոյի մասին օրենքը, որպես հրատապ հարց, արդեն դրել էինք սեղանին, և Մշակույթի նախարարությունը փորձում էր հնարավորինս արագ ամեն ինչ անել, որպեսզի այդ օրենքը կյանքի կոչվի:

Հարցազրույցն ամբողջությամբ՝ տեսանյութում:

Մհեր Արշակյան