Կստեղծվի շրջիկ դպրոց, որը կշրջի մարզերով և կանանց կառաջարկի մուտք գործել քաղաքականություն. պատգամավոր

Ազգային ժողովի «Իմ քայլը» խմբակցության պատգամավոր, «Քաղաքացիական պայմանագիր» կուսակցության վերահսկող հանձնաժողովի նախագահ Սոնա Ղազարյանը նախատեսում է ստեղծել շրջիկ դպրոց, որը կշրջի Հայաստանի մարզերով և կօգնի կանանց մուտք գործել քաղաքականություն, եթե ցանկություն ունեն:

«Կան թիրախային խմբեր՝ երիտասարդներ և կանայք, ում մուտքը քաղաքականություն այսքան տարիների ընթացքում տեղի չի ունեցել քաղաքական ոչ ճիշտ գործընթացների արդյունքում: Ես առաջարկել եմ ստեղծել մի խումբ, որը կշրջի տարբեր մարզերով, հանդիպումներ կունենա երիտասարդների, հատկապես՝ կանանց հետ: Մենք մեր օրինակով ցույց կտանք, թե ինչ ասել է՝ լինել քաղաքական գործիչ և կին»,- Factor.am-ի հետ զրույցում մանրամասնեց պատգամավորը:

Նա նշեց, որ վերջերս Գյումրիում հանդիպել է այն կանանց հետ, ովքեր ցանկանում են քաղաքականությամբ զբաղվել: Սոնա Ղազարյանն ասաց՝ այս հարցը դեռ պետք է քննարկեն «Քաղաքացիական պայմանագիր» կուսակցության վարչության հետ. «Այս գործընթացը պետք է մաքսիմալ ներառական լինի»:

Հարցին՝ ցանկություն կա՞, որ հետագայում այդ կանայք անդամագրվեն ՔՊ-ին, Սոնա Ղազարյանը դրական պատասխան տվեց:

«Այո՛, նույն արժեհամակարգը կիսող կանանց ցանկանում ենք տեսնել նաև կուսակցության շարքերում: Ինչպես գիտեք՝ հեղափոխությունից հետո ՔՊ-ն ստանում է անդամակցության բազմաթիվ հայտեր, սա էլ իր հերթին կարող է ֆիլտր լինել»,- ասաց պատգամավորը:

Նշենք, որ ՔՊ-ն կանանց խորհուրդ չունի:

Նարեկ Կիրակոսյան