Քաղաքականություն
18.06.2019 | 16:41«Գուցե նրա համար, որ նա ֆրակցիայի հետ երկար հանդիպում է ունեցել, գուցե նրա համար, որ Վահե Գրիգորյանին մի մասը վաղուց երկար ժամանակ ճանաչում են և հնարավորություն ունեցել են նրա հետ այս կամ այն մտահոգիչ հարցի շուրջ զրուցել»,- այս մասին ԱԺ-ում ասաց խորհրդարանի խոսնակ Արարատ Միրզոյանը՝ պատասխանելով Factor.am-ի հարցին, թե ինչով էր պայմանավորված այն, որ թեկնածուին ուղղված հարցերը քիչ էին:
«Բայց ես չեմ ուզում ակնհայտ ճշմարտությունները ծածկադմփոց անելու փորձ անել կամ փարիսեցիության տպավորություն թողնել: Գիտեք՝ «Իմ քայլը» ֆրակցիայում դրական վերաբերմունք կա նրա թեկնածության շուրջ, այնպես որ՝ թաքցնելու բան չկա»,- շարունակեց Միրզոյանը։
Ինչ վերաբերում է Վահե Գրիգորյանի հայտարարությանը, որ եթե որևէ իրավիճակում ՍԴ նախագահ Հրայր Թովմասյանը հրաժարական տա, ապա ինքը պատրաստ է աշխատել որպես ՍԴ նախագահ, Արարատ Միրզոյանն արձագանքեց. «Ո՞վ չէր ուզի, եթե լիներ Վահե Գրիգորյանի փոխարեն: Կարծում եմ՝ ոչ բոլորը կարող են ունենալ նույն պատրաստվածության աստիճանը, բայց բավականին գայթակղիչ է հնչում, համաձայն չե՞ք: Հստակ արձանագրենք՝ ես չասացի, թե ես ուզում եմ, որ Հրայր Թովմասյանը հրաժարական տա, Վահե Գրիգորյանն էլ նրան փոխարինի: Իշխանությունը չի կարող դիտարկել Հրայր Թովմասյանի հրաժարականը»:
Մանրամասները՝ տեսանյութում:
Շողիկ Գալստյան
