Հենրիխ Մխիթարյանի հոր անունը կրող մարզադաշտը վերաբացվել է շինարարական թերություններով ու խնդիրներով

Հունիսի 2-ի Շիրակի մարզի Սպանդարյան գյուղում մեծ շուքով վերաբացվել էր  Հայաստանի ֆուտբոլի հավաքականի ավագ Հենրիխ Մխիթարյանի հոր՝ «Արարատ» ակումբի հարձակվող Համլետ Մխիթարյանի անունը կրող մարզադաշտը: Պարզվում է՝ նորաբաց մարզադաշտում կան բազմաթիվ խնդիրներ, որոնք կասկածներ են առաջացնում, թե իսկապես 37 մլն դրամ է ծախսվել, որը հատկացվել է պետբյուջեից: Այս մասին իր ֆեյսբուքյան էջում գրել էր ԱԺ «Իմ քայլը» խմբակցության պատգամավոր Սոֆյա Հովսեփյանը:

«Ինչպես և խոստացել էի՝ հասցրեցի գնալ Շիրակի մարզի Սպանդարյան գյուղ, որպեսզի տեղում տեսնեմ աղմուկ հանած 37 մլ դրամ արժողությամբ ֆուտբոլի մարզադաշտը: Դուք ճիշտ էիք, այն անպատմելի վիճակում էր և այդ դաշտում անգամ 10% ծախս չկար։ Նկարներում պարզ երևում է, թե կողային ցանցերն ինչպես են պատռվել գնդակի կպնելուց, այն դեպքում, երբ դեռ չի շահագործվում։ Սա անընդունելի է և վստահ եմ՝ կբացահայտվեն բոլոր մեղավորները: Բացի մարզադաշտից՝ այդ գյուղում կառուցվել է նաև մանկապարտեզ, որը դեռ շահագործման չհանձնած՝ ունի բազմաթիվ խնդիրներ որակի հետ կապված: Խոսել եմ շինարարական կազմակերպության հետ, պահանջել արագ հարցը կարգավորել և բոլոր խնդիրները վերացնել, իսկ որտեղ էլ հիմնանորոգման կարիք արդեն կա, ապա շտապ գործի անցնել: Շինարարը խոստացավ վաղվանից գործը սկսել և ինձ տեղյակ պահել ամբողջ ընթացքի մասին: Վստահ եմ՝ մանկապարտեզի հարցը կկարգավորվի, իսկ մարզադաշտով կզբաղվեն իրավապահ մարմինները»,- գրել է ԱԺ պատգամավորը:

Սպանդարյան համայնքի ղեկավար Ավետիք Մխիթարյանը Factor.am-ի հետ զրույցում հաստատեց, որ մարզադաշտը շահագործման է հանձնվել թերություններով, բայց շինարարը խոստացել է դրանք վերացնել:

«Մարզադաշտում հողային, գրունտային աշխատանքները վատ վիճակում են, այսօր եմ շինարարներին տեսել, ովքեր կատարել են աշխատանքները: Ասում են՝ կաշխատենք վերացնել խնդիրները»,- ասաց Սպանդարյան համայնքի ղեկավարը՝ հավելելով. «Շինարարը պետք վերացնի խնդիրները, պատվիրատուն թող մտածի՝ ինչո՞ւ է այդպիսի բան եղել։ Ուղղակի պիտի պատվիրատուն հետամուտ լիներ, որ աշխատանքները կատարվեն որակով»։

Ավետիք Մխիթարյանը նաև նշեց, որ համայնքապետարանը ծախսված գումարների կամ հնարավոր չարաշահումների հետ կապ չունի:

«Համայնքապետարանը ո՛չ պատվիրատու է, ո՛չ էլ գումար է փոխանցել, որ կառուցեն, պետական բյուջեի միջոցներով է կառուցվել, Քաղաքաշինության պետական կոմիտեի պատվերով։ Համայնքապետարանն ընդամենը շահագործող մարմին է, այդպես կարելի է ասել»,- ասաց Ավետիք Մխիթարյանը։

Տարածքը, որտեղ հիմա մարզադաշտն է,  ծառայել է որպես արոտավայր, այստեղից էլ գրունտային խնդիրներն են առաջացել: Համայնքի ղեկավարն ասում է՝ շատերի կարծիքով մարզադաշտը, գուցե,  ստանդարտներին համապատասխան է, իրականում այն զուտ բակային մարզադաշտ է:

«Հիմա սա էլ եվրոպական ստանդարտներին համապատասխան չէ, սովորական, բակային գյուղի պայմաններին հարմարեցրած մարզադաշտ է, որն ունի բոլոր հարմարությունները՝ հանդերձարան, լոգարան»,- ասաց Ավետիք Մխիթարյանը՝ հավելելով, որ մարզադաշտի բացումը նույնիսկ մի քանի անգամ հետաձգվել է:

«Խնդիրն այն է, որ Հենրիխ Մխիթարյանը պիտի գյուղ գար, քանի անգամ հետաձգվել է բացումը, բայց արվեց: Եվ ընդհանրապես, գյուղի երեխային չի հետաքրքրում՝ մարզդաշտը շահագործման հանձնվա՞ծ է, թե՞ ոչ։ Ինքը պիտի խաղա։ Շահագործված է, շահագործված չէ, դա արդեն շինարարական կազմակերպության ու պատվիրատուի գործն է»,- նշեց նա:

Սպանդարյանի համայնքապետի խոսքով՝ իրավապահներն իրեն մարզադաշտի հարցով չեն դիմել:

Էմմա Չոբանյան