ԵՄ-ն ամեն ինչ կանի, որպեսզի Հայաստանի մասնակցությունը «Ստեղծարար Եվրոպա» ծրագրին շարունակվի․ Պյոտր Սվիտալսկի․ ՏԵՍԱՆՅՈՒԹ

ԱԺ նիստերի դահլիճում գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախաձեռնությամբ հրավիրվել են խորհրդարանական լսումներ՝ «Կինոյի ոլորտում օրենսդրական հնարավոր լուծումների վերաբերյալ» թեմայով, որին մասնակցում է նաև ՀՀ-ում ԵՄ պատվիրակության ղեկավար Պյոտր Սվիտալսկին:

Իր ելույթի մեկնարկին դեսպանը շնորհավորեց ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովին՝ այսօրվա լսումները կազմակերպելու համար՝ ընդգծելով, որ սա փաստում է, որ խորհրդարանը ոչ միայն օրենսդիր մարմին է, այլ նաև հանրային երկխոսության հարթակ։

Դեսպանը նկատեց, որ պետք է արժևորել «Ոսկե Ծիրան» հիմնադրամի դերը՝ կինոյի մասին օրենքի նախագծի մշակման հարցում, իսկ ինչ վերաբերում է այդ նախագծին ԵՄ աջակցությանը՝ դեսպանը հավելեց․ «Մենք գտնում ենք, որ մշակույթը շատ հզոր գործիք է ՀՀ-ի համար, որը կարող է ոչ միայն բարձրացնել ՀՀ-ի իմիջը, այլլև ներդրում կատարել տնտեսության զարգացման գործում։ Կինոն այն ոլորտն է, որտեղ ՀՀ-ն ունի ներուժ, իսկ Փարաջանովի հայրենիքը պետք է մյուսների համար օրինակ ծառայի։ ԵՄ-ն ցանկանում է նաև աջակցել Հայաստանին ԵՄ՝«Ստեղծարար Եվրոպա» ծրագրին մասնակցելու համար, որին ենթածրագրերի մակարդակով Հայաստանն արդեն մասնակցում է»։

ՀՀ-ում ԵՄ պատվիրակության ղեկավարը նշեց, որ չեն կարող կանխատեսել, թե «Ստեղծարար Եվրոպա»-ն ինչ տեսք կունենա 2021 թվականին, քանի որ ծրագիրը մտնում է ֆինանսական նոր շրջափուլ։

«Սակայն ԵՄ-ն ամեն ինչ կանի, որպեսզի Հայաստանի մասնակցությունը «Ստեղծարար Եվորպա» ծրագրին շարունակվի»,- ասաց  դեսպանը։

Մանրամասները՝ տեսանյութում։