11.01.2025 | 19:09
Երկրաշարժ Սպիտակ քաղաքից 1 կմ հյուսիս
Թուրքիայում իշխող կուսակցության պատգամավորը դատապարտել է հայ կնոջ դանակահարությունը
Քաղաքականություն
14.06.2019 | 13:58
Թուրքիայում իշխող «Արդարություն և զարգացում» կուսակցության (ԱԶԿ-AKP) պատգամավոր Մուսթաֆա Յեներօղլուն անդրադարձել է Սամաթիայում հարձակման ենթարկված հայ ընտանիքի` Թուրքիան լքելու վերաբերյալ որոշմանը. գրում է ermenihaber-ը:
Թուրք պատգամավորը Twitter-ում կատարած գրառումով քննադատել է իշխանամետ լրատվամիջոցներին այն բանի համար, որ չեն լուսաբանել Ստամբուլում ապրող հայ ընտանիքի բնակարան ներխուժելու և տանտիրուհուն դանակահարելու միջադեպը: Նշենք, որ այդ դեպքի մասին հրապարակումներ արել են միայն «Ակօս» թերթը և մի քանի ընդդիմ ադիր լրատվամիջոցներ միայն:
Գրառման մեջ մասնավորապես ասվում է.
«Ստամբուլում հայ ընտանիքին նախ սպառնում են, որից հետո ներխուժում են իրենց տուն և դանակահարում կնոջը: Ընտանիքը որոշել է լքել Թուրքիան: Խստորեն դատապարտում եմ այս դաժանությունը: Այն ռասիստները, որոնք այս ամենի հեղինակն են, Թուրքիայի ամենամեծ թշնամին են: Հույս ունեմ, որ հնարավորինս կարճ ժամանակում կձերբակալվեն»:
Թուրք պաշտոնյան աջակցությունն է հայտնել հայ ընտանիքին:
Նրա խոսքով` Եվրոպայում մուսուլմանների դեմ ռասիստական հարձակումների և Թուրքիայում տարբեր կրոնական և ազգային պատկանելիության անձանց նկատմամբ իրականացվող հարձակումների միջև որևէ տարբերություն չկա:
Հիշեցնենք, որ մայիսի 31-ին Ստամբուլի Սամաթիա թաղամասում անհայտ անձինք ներխուժել էին Արփինեի բնակարան և դանակահարել նրան: Այնուհետև դիմել էին փախուստի՝ բղավելով, «սա դեռ սկիզբն է»։ Դեպքի կապակցությամբ հետաքննություն էր սկսվել։
Ավելի ուշ հայ ընտանիքը հայտնել էր, որ լքելու են Թուրքիան և վերադառնալու են Հայաստան:
