30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Բաքվի կողմից Լեռնային Ղարաբաղի հակամարտության միակ լուծումը պատերազմ ներկայացնելու փորձն է․ Տարոն Հովհաննիսյան
Քաղաքականություն
12.06.2019 | 17:58
Ադրբեջանի բանակը 2016թ. սկսած տարեկան 2-3 խոշոր զորավարժություն է իրականացնում: Այս տարի նման երկու զորավարժություն է դեռ անցկացվել, սակայն պետք է նշեմ, որ 2016թ. սկսած այս զորավարժություններն ինտենսիվացնելու որոշակի միտում նկատվում է:
Ադրբեջանը հարձակողական բնույթի զորավարժություններ է փորձում խաղարկել, իսկ սա ցույց է տալիս, որ իրենք իրենց մարտավարությունը չեն փոխել:
Այս մասին այսօր հրավիրված մամուլի ասուլիսի ժամանակ, անդրադառնալով Ադրբեջանի զինված ուժերի կողմից պարբերաբար իրականացվող զորավարժություններին, ասաց «Օրբելի» կենտրոնի փորձագետ Տարոն Հովհաննիսյանը։
Վերջինիս խոսքով՝ Բաքվի կողմից Լեռնային Ղարաբաղի հակամարտության միակ լուծումը պատերազմը ներկայացնելու փորձն է։
«Իրենք մինչ այժմ էլ դիտարկում են հավանական հնարավորության դեպքում ռազմական ճանապարհով հակամարտությունը լուծելու հարցը, և որևէ պայմանավորվածություն պատրաստ չեն իրականացնելու: Իրենց գործողություններով տեղեկատվական դաշտում ևս փորձում են ցույց տալ, որ պատերազմը հակամարտության լուծման միակ ելքն է: Նրանք փորձում են տեղեկատվական դաշտում նախապատրաստել, միշտ այդպես են անում ցանկացած գործողությունից առաջ: Եթե զգան, որ արագ ժամանակում կարող են հաջողության հասնել, ապա չեն վարանի»,- ասաց Հովհաննիսյանը:
Անդրադառնալով հունիսի 7-11-ը Նախիջևանում անցկացված զորավարժություններին՝ Թուրքիայի և Ադրբեջանի զինված ուժերի մասնակցությամբ, Հովհաննիսյանը նշեց, որ Թուրքիայի հետ նման զորավարժություն 2017 թվականին ևս անցկացվել է։
«Այս առումով մենք դեռ աննախադեպ ինչ-որ բան չենք տեսել: Եթե մենք ագրեսիայի որևէ նշույլ ֆիքսենք, բնականաբար պետք է այդ ամենի մասին հայտնենք, նաև բողոքենք, բայց, ըստ էության, այդպես շատ հարց չենք կարող լուծել: Այստեղ միակ կարևոր խնդիրն այդ հատվածում մեր զինված ուժերն ամրացնելն է: Եթե նախկինում ավելի պասիվ էր Նախիջևանի ուղղությունը, վերջին 2-3 տարվա ընթացքում այն ավելի ակտիվանում է: Սա չի նշանակում, որ այդտեղից կարող են սկսվել ակտիվ ռազմական գործողություններ, բայց առնվազն նշանակում է, որ կարող է լարվածությունն աճել այդ շրջանում, ինչպես տեսանք անցյալ տարվանից հետո: Այստեղ մեր հիմնական խնդիրն է մեր ուժերին այնպես պատրաստելը, որպեսզի հնարավոր գործողության դեպքում կարողանանք շատ արդյունավետ պայքարել իրենց ուժերի դեմ»,- նշեց փորձագետը:
