15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Թեհրանի նկատմամբ Վաշինգտոնի ճնշումը հասել է առավելագույնին և այլևս արդյունավետ չէ. Իրանի նախագահ
Քաղաքականություն
12.06.2019 | 17:21
Իրանի նախագահ Հասան Ռոհանին հայտարարել է, որ Թեհրանի նկատմամբ Վաշինգտոնի ճնշման մակարդակը հասել է առավելագույնի և այլևս չի կարող արդյունավետ լինել: Նա հավելել է, որ երկրում շատ լավ իրավիճակ է՝ չնայած թշնամիների քարոզչությանը, գրում է ԻՌՆԱ-ն:
Նախարարների կաբինետի այսօրվա նիստում Ռոհանին նշել է նաև, որ անցյալ տարվա ընթացքում ԱՄՆ-ն աննախադեպ պատժամիջոցներ է սահմանել և պատմական ճնշում է գործադրել Իրանի վրա:
«Չնայած ճնշումներին և թշնամիների քարոզչությանը՝ մենք շատ լավ պայմաններ ունենք: Դա չի նշանակում, որ ոչ մի խնդիր չկա»,- ասել է Իրանի նախագահը և հավելել. «Անկասկած՝ այն, ինչ ԱՄՆ-ն արեց Իրանի ժողովրդի հանդեպ, տնտեսական ահաբեկչության ամենավառ օրինակներից է, և դա արձանագրվելու է պատմության մեջ: Բայց, չնայած այդ ճնշումներին, Իրանի ժողովուրդը դիմադրեց»:
Նշենք, որ վերջին ամիսներին ԱՄՆ-ի և Իրանի հարաբերությունները զգալի լարվել են: Ամերիկյան իշխանությունները կոշտ պատժամիջոցներ են սահմանել Իրանի տնտեսության առանցքային ոլորտների նկատմամբ և շարունակում են ուժեղացնել պատժամիջոցային ճնշումը: ԱՄՆ-ն նաև Իսլամական հեղափոխության պահապանների կորպուսն ահաբեկչական կազմակերպություն է ճանաչել:
Ի պատասխան՝ Իրանն ահաբեկչական կազմակերպություն է ճանաչել ամերիկյան Զինված ուժերի կենտրոնական հրամանատարությունը, իսկ ԱՄՆ-ն՝ «ահաբեկչությունը հովանավորող պետություն»:
