Գուցե ես էլ եմ վատ աշխատել, մեր թիմն էլ․ Ռոմանոս Պետրոսյանը՝ Աբովյանի ընտրությունների մասին. ՏԵՍԱՆՅՈՒԹ

Կոտայքի մարզպետը դիմելու է ԱԺ նախագահին՝ «Բարգավաճ Հայաստան» խմբակցության պատգամավոր Էդուարդ Բաբայանի հարցով ԱԺ Էթիկայի հանձնաժողով ստեղծելու համար։ Այս մասին ԱԺ-ում լրագրողների հետ զրույցում ասաց մարզպետ Ռոմանոս Պետրոսյանը՝ նշելով, որ Աբովյան քաղաքի ընտրություններում խորհրդարանական ընդդիմությունը՝ ԲՀԿ-ն, իր հովանավորյալ թեկնածուով հաղթեց։

«Սա բնորոշ էր նախահեղափոխական Հայաստանին, քանի որ կառավարող ուժը գերխնդիր էր դնում՝ տոտալ վերահսկողության տակ առնել բոլոր համայնքները։ Իսկ ռեգիոնալ քաղաքականության առումով, և մեր քաղաքական թիմի տեսակետից արձանագրեցինք դե յուրե պարտություն՝ պայմանավորված քաղաքացու քվեով»,- ասաց Պետրոսյանը։

Մարզպետը շարունակեց պնդել, որ այս պարտության մեջ նա տեսնում է արժանապատիվ քաղաքացու պարտությունը. «Հաղթող թեկնածուն, իր հովանավոր ԲՀԿ-ն այդ հաղթանակին հասնելու համար բազմաթիվ փորձեր են եղել կիրառել հին, քրեաօլիգարխիկ գործիքակազմեր, որոնցից մեկը՝ համարներով ու անուն-ազգանունով ցուցակը, մեր հանձնաժողովականի միջոցով վեր հանեցի։ Քրեաօլիգարխիկի հետ կապված փաստն այն է, որ հաղթած քաղաքապետի թեկնածուն ու շտաբը կառավարվում էր «Մուլտի գրուպ» կոնցեռնի և Գագիկ Ծառուկյանի անմիջական ու մերձավոր շրջապատի կողմից։ Գագիկ Ծառուկյանի թիկնազորը տեղամասերում ու տեղամասի շրջակայքերում էր, ինչպես նաև Աբովյանի ավագանու գրեթե բոլոր անդամները ենթաշտաբի պետեր էին, բայց ավագանու ինստիտուտը կոչված է վերահսկելու քաղաքապետին»:

Մանրամասները՝ տեսանյութում։

Շողիկ Գալստյան