Վանաձորի Արցախ պուրակը ԽՍՀՄ տարիներից ի վեր առաջին անգամ հիմնանորոգվում է. ԼՈՒՍԱՆԿԱՐՆԵՐ

Արդեն մի քանի օր է՝ Վանաձորի Արցախ պուրակում հիմնանորոգման աշխատանքներ են սկսվել: Քաղաքապետ Մամիկոն Ասլանյանը վստահեցնում է՝ Վանաձորի համայնքապետարանի ու ՀՀ Կառավարության սուբվենցիոն ծրագրերի շնորհիվ մի քանի ամսից վանաձորցիները կունենան մաքուր ու բարեկարգ պուրակ:

«Մշակույթի նախարարության հուշարձանների պահպանության կողմից հաստատված նախագծով են իրականացվում աշխատանքները, որպեսզի վերականգնվի հին տեսքը: Լինելու է սալիկապատում, գազոններ, նստարաններ են տեղադրվելու: Նախատեսված են ճեմուղիներ»,- պատմեց քաղաքապետը:

Պուրակի հիմնանորոգման համար տրամադրվել է 43 միլիոն դրամ, մրցույթը շահել են 24 միլիոն դրամով: Նախատեսվում է, որ աշխատանքներն ավարտին կհասցվեն 4 ամսվա ընթացքում:

«Մենք հետևողական ենք լինելու, որպեսզի շինարարական աշխատանքներն իրականացվեն բարձր որակով ու մակարդակով: Թույլ չենք տալու նախագծերից որևէ շեղում, հետևելու ենք, որպեսզի տարեվերջին, երբ ծրագրերն ավարտվեն, ունենանք շատ ավելի նորացված, ավելի թարմ ու գեղեցիկ Վանաձոր»,- ասաց քաղաքապետը:

Factor.am-ի հարցին, թե ինչպե՞ս են վարվելու այգու հին սալիկների հետ, քանի որ դրանք ևս համայնքային գույք են համարվում, Մամիկոն Ասլանյանը պատասխանեց. «Սալիկների որ մասն ամբողջական կմնա, կպահեստավորենք, չնայած պայմանագրով նման բան նախատեսված չի եղել: Որովհետև հիմնականում իրենց դարն ապրած սալիկներ են, բայց մենք չենք թողնի, որպեսզի անձնական նպատակներով օգտագործեն: Դրա օպերատիվ կառավարումը մենք ենք իրականացնում, կվերցնենք և ըստ կարևորության կբաշխենք այլ տեղերի սալիկապատման համար: Համայնքի որ հատվածներում նմանատիպ սալիկներ կան, մի քանի տեղ փոխարինել ենք, մնացածն էլ կտեսնենք, թե ոնց ենք պահեստավորում»:

Արցախ պուրակը լոռեցիների համար կարևոր նշանակություն ունի. Արցախյան շարժումը նրանց համար հենց այստեղից է սկիզբ առել, շատ հերոսների էլ վերջին հրաժեշտը հենց այս պուրակում են տվել:

Պուրակը հուշարձանների ցանկում ներառված է որպես տեղական նշանակության հուշարձան: Խորհրդային միության տարիներից ի վեր այն երբեք չի հիմնանորոգվել: Մամիկոն Ասլանյանը տեղեկացրեց, որ տարածքից հանվում են նաև բոլոր ժամանակավոր տեղադրված տաղավարները:

Տարածքում կտեղադրվի միայն տոմսարկղ՝ մշակութային միջոցառումների տոմսեր վաճառելու համար: Սա ևս համաձայնեցված է Մշակույթի նախարարության հետ. «Վանաձորը, ըստ էության, տոմսարկղ չունի: Դեռ նախագիծը չունենք, բայց նախատեսվում է, որ կկառուցվի կենտրոնացված փոքրիկ տոմսարկղ»:

Տաթևիկ Ղազարյան