11.07.2026 | 19:33
Երասխ գյուղի մոտ այրվել է կցորդով բեռնատար․ վարորդը հոսպիտալացվել է
Էդուարդ Աղաջանյանը մասնակցել է «Բաց կառավարման գործընկերություն» նախաձեռնության համաժողովին
Քաղաքականություն
11.06.2019 | 18:12
Օտտավայում կայացել է Բաց կառավարման գործընկերություն նախաձեռնության (ԲԿԳ) բարձր մակարդակի համաժողովը:
Ինչպես հայտնեցին ՀՀ վարչապետի աշխատակազմի տեղեկատվության և հասարակայնության հետ կապերի վարչությունից, համաաժողովի կարևոր ձեռքբերումներից էր Իրական սեփականատերերի բացահայտման (ԻՍԲ) գործընթացի Առաջատար երկրների խմբի ստեղծումը: Խումբը միավորում է ԻՍԲ առաջատար երկրներին՝ ստեղծելու միասնական ձևաչափեր, մեթոդներ, խնդիրների հաղթահարման համալիր լուծումներ և այլն: ԻՍԲ շարքում առաջամարտիկներից են Մեծ Բրիտանիան և Ուկրաինան: ԲԿԳ-Հայաստան գործողությունների ծրագրում ՀՀ կառավարությունը ստանձնել է հանձնառություն ներդնելու Իրական սեփականատերերի բացահայտման ռեգիստր, որի լիարժեք գործարկումը կնպաստի ստվերում գործունեություն ծավալող անձանց բացահայտմանը, ակտիվների վերադարձին, միջազգային կոռուպցիոն և փողերի լվացման հանցավոր գործընթացների դեմ պայքարին:
ՀՀ վարչապետի աշխատակազմի ղեկավար, ԲԿԳ-Հայաստան գործընթացի համակարգող Էդուարդ Աղաջանյանն իր ելույթում նշել է, որ ՀՀ կառավարությունը հաստատակամ է բարձրացնելու թախանցիկությունը պետական կառավարման համակարգում, կառավարության գործունեությունն ավելի հաշվետու դարձնելու և լիարժեք իրականացնելու կոռուպցիայի դեմ պայքարը: Համաժողովում գտնվելու ընթացքում Էդուարդ Աղաջանյանը «ԲԿԳ գործընթացը Արևելյան գործընկերության շրջանակներում և Արևմտյան Բալկաններում» և «Բաց արդարադատություն» կլոր սեղան քննարկումներին մասնակցել է որպես խոսնակ:
ԲԿԳ համաժողովի շրջանակներում Էդուարդ Աղաջանյանն ունեցել է մի շարք երկկողմ հանդիպումներ, մասնավորապես, Ասիական զարգացման բանկի Հյուսիսային Ամերիկայի ներկայացուցիչ Բարտլետ Էդեսի, Միացյալ Թագավորության (ՄԹ) FMA ընկերության հիմնադիր, ՄԹ կառավարության աշխատակազմի նախկին ղեկավար Ֆրենսիս Մադի և ՄԹ թվային բարեփոխումների պետական գործակալության ներկայացուցիչների, ՄԹ խորհրդարանի անդամ, Հակակոռուպցիոն ծրագրի համակարգող Ջոն Փենրոսի, ԲԿԳ ղեկավարի տեղակալ Ջո Փավլի, Ասիա-Խաղաղօվկիանոսյան տարածաշրջանի համակարգող Շրեյա Բասույի և ԲԿԳ կառավարող խորհրդի քաղհասարակության համանախագահ, Թափանցիկություն և կառավարում ծրագրի տնօրեն Ռոբին Հոդսի և այլ շահագրգիռ կողմերի հետ:
