15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Զախարովայի խոսքերը սխալ էին մեկնաբանել. Սերգեյ Կոպիրկինը՝ ՌԴ ԱԳՆ խոսնակի աղմկահարույց գրառման մասին. ՏԵՍԱՆՅՈՒԹ
Քաղաքականություն
11.06.2019 | 14:14
Հայաստանում ՌԴ դեսպան Սերգեյ Կոպիրկինը կարծում է, որ Ռուսաստանի ԱԳՆ խոսնակ Մարիա Զախարովայի գրառումը սխալ է մեկնաբանվել:
«Զախարովան ինքը պարզաբանեց: Նրա խոսքերը մեկնաբանվել էին որպես ծաղր, և նա ստիպված էր պարզապես շարունակել, ներկայացնել ամբողջ մեջբերումը: Խոսքն այն մասին էր, որ ամեն ինչ պետք է լուծել՝ հարգելով միմյանց շահերը և փոխշահավետ լուծումներ գտնել»,- ասաց ՌԴ դեսպանը:
Կոպիրկինը կարծում է, որ էմոցիոնալ առաջին պառթկումը կանցնի, իսկ Զախարովայի գրառման հանդեպ ավելի օբյեկտիվ մոտեցումը կգերակշռի:
Հիշեցնենք, որ ՌԴ ԱԳՆ պաշտոնական ներկայացուցիչ Մարիա Զախարովան ֆեյսբուքում մեջբերել էր Պետերբուրգյան միջազգային տնտեսական համաժողովի լիագումար նիստի ժամանակ ունեցած ելույթում ՀՀ վարչապետ Նիկոլ Փաշինյանի հնչեցրած խոսքերը՝ չմեկնաբանելով այն: «Փաշինյանը՝ պետերբուրգյան համաժողովում. «Երբ բոլորը դժգոհ են, պետք է այնպես անել, որ բոլորը գոհ լինեն»»,- գրել էր Զախարովան:
Գրառումը, սակայն, օգտատերերի կողմից որպես ծաղր և հեգնանք էր ընկալվել, իսկ Զախարովային մեղադրել էին ոչ դիվանագիտական պահվածքի համար: Կարճ ժամանակ անց ՌԴ ԱԳՆ խոսնակը ներկայացրել էր Նիկոլ Փաշինյանի ելույթի ամբողջական հատվածը՝ մեկնաբանելով. «Բովանդակալից, դրական և զիլ։ Ինձ շատ դուր եկավ: Իսկ սադրիչներին մի լսեք»:
Մանրամասները՝ տեսանյութում:
