Վեթինգը միայն դատավորների նկատմամբ կիրառելը քաղաքական տեսարան ապահովելու համար է. Զարուհի Փոստանջյան. ՏԵՍԱՆՅՈՒԹ

Կարծում եմ, որ Եվրոպայի խորհրդի և Եվրամիության կողմից սպառիչ պատասխան է տրվել այն մասով, որ քաղաքակիրթ համայնքների ու հասարակության համար ընդունելի չէ դատարանները շրջափակելը և դատարանների նկատմամբ ճնշում բանեցնելը: Այս մասին այսօր հրավիրված ասուլիսի ընթացքում նշեց «Երկիր Ծիրանի» կուսակցության առաջնորդ Զարուհի Փոստանջյանը:

Նրա խոսքով՝ արդարադատության իրականացման հետ կապված խնդրի դեպքում գործող իշխանությունը կարող էր հրավիրել դատախազին, ընդհանուր դատաիրավական համակարգի վերաբերյալ հաշվետվություն պահանջել:

«Մենք տեսնում ենք, որ Նիկոլ Փաշինյանն արդեն փորձում է ծայրահեղ միջոցների դիմել, որոնց թվում նաև դատարանների շրջափակումն է: Եթե չլիներ Ռոբերտ Քոչարյանի գործը, այդպիսի կոչ նա չէր անի»,- նշեց «Երկիր Ծիրանի» կուսակցության առաջնորդը:

Ըստ նրա՝ հարց է՝ արդյո՞ք դատարանների շրջափակմամբ և դրան հաջորդած ԲԴԽ նախագահ Գագիկ Հարությունյանի հրաժարականով դատաիրավական համակարգում որևէ բան է փոխվել. «Մեր առջև խնդիր է դրված համակարգային փոփոխության, մինչդեռ դրան միտված որևիցե քայլ գործող իշխանությունը չի ձեռնարկել»:

Անդրադառնալով անցումային արդարադատության համար անհրաժեշտ գործիքներից վեթինգին, «Երկիր Ծիրանի»-ի առաջնորդն ընդգծեց: «Նիկոլ Փաշինյանը վեթինգի գործընթացն իրենից ու իր ընտանիքի անդամներից պետք է սկսի: Միայն դատավորների նկատմամբ վեթինգ կիրառելը քաղաքական տեսարան ապահովելու համար է»:

Մանրամասները՝ տեսանյութում: