18.10.2026 | 20:17
«Մեր նպատակը նոր խոստումներ տալը չէ, այլ ստանձնած պարտավորությունները կատարելը»․ Մաթևոսյան․ ՏԵՍԱՆՅՈւԹ
ԼՀԿ-ն աղմկոտ օրակարգով կրկին ցանկանում է ԱԺ արտահերթ նիստ հրավիրել
Քաղաքականություն
31.05.2019 | 18:05
Ազգային ժողովի «Լուսավոր Հայաստան» ընդդիմադիր խմբակցությունը կրկին ցանկանում է աղմկոտ օրակարգով ԱԺ արտահերթ նիստ գումարել: Խոսքը վարչապետ Նիկոլ Փաշինյանի հայտարարության հիման վրա քաղաքացիների կողմից դատարանների շենքերի շրջափակմանն է վերաբերվում:
Նույն օրակարգով արտահերթ նիստ հրավիրելու մասին ԼՀԿ խմբակցության պատգամավոր Անի Սամսոնյանը Factor.am-ին փոխանցեց, որ խմբակցությունը հայտարարությամբ հանդես կգա. «Չեմ բացառում, որ կլինի»:
Դիտարկմանը, որ իշխանությունները մեկ անգամ արդեն մերժել են ընդդիմության՝ այդ թեմայով արտահերթ նիստ հրավիրելու առաջարկը, Անի Սամսոնյանն ասաց. «Մենք հետևողական և համառ ենք մեր բոլոր առաջարկներում»:
Հիշեցնենք, որ ընդդիմադիր «Լուսավոր Հայաստան» խմբակցությունը դեռ մայիսի 20-ին էր առաջարկել այդ թեմայով արտահերթ նիստ հրավիրել: ԼՀԿ-ի առաջարկին միացել էր նաև «Բարգավաճ Հայաստան» խմբակցությունը:
Ընդդիմադիր երկու խմբակցությունների պատգամավորների ստորագրությունները բավարար էր արտահերթ նիստ հրավիրելու համար, սակայն երբ հարցը քննարկվեց ԱԺ Խորհրդի նիստում, իշխանական խմբակցության անդամները դեմ քվեարկեցին ԱԺ արտահերթ նիստ հրավիրելու գաղափարին: Արտահերթ նիստ հրավիրելու համար անհրաժեշտ է 33 պատգամավորի ստորագրություն:
Նարեկ Կիրակոսյան
