ՀՀ-ում տնտեսական իրավիճակի զարգացումը տեղի է ունենում դրական և լավատեսական դինամիկայով․ վարչապետ. ՏԵՍԱՆՅՈՒԹ

Այսօր կառավարության նիստի մեկնարկին ՀՀ վարչապետ Նիկոլ Փաշինյանն անդրադարձավ ՀՀ վիճակագրական կոմիտեի հրապարակած ապրիլ ամսվա մակրոտնտեսական ցուցանիշներին:

«Առաջին 4 ամսվա տվյալներով՝ Հայաստանում տնտեսական իրավիճակի զարգացումը տեղի է ունենում դրական և լավատեսական դինամիկայով: Ըստ հրապարակված տվյալների՝ ապրիլին տնտեսական ակտիվության ցուցանիշը 9.2% է, և եթե այն համադրում ենք առաջին եռամսյակի արդեն ամփոփված ցուցանիշի հետ՝ ՀՆԱ-ի 7.1% աճ է գրանցվել, սա հիմք է տալիս ասելու, որ տնտեսությունն ունի լավ տրամադրություն և մեր խնդիրն է հասցեական և ճիշգրիտ կապիտալ ծախսերի միջոցով խթանել այս լավ տրամադրությունը և, ի վերջո, կարողանալ ավելի լավ ցուցանիշների հասնել»,- հայտարարեց վարչապետ Նիկոլ Փաշինյանը։

Վարչապետի փոխանցմամբ՝ արդյունաբերական արտադրանքի ծավալը 13.2% է, շինարարության ոլորտում աճն ավելի քիչ է, քան սպասվում էր, թեև վարչապետը համոզված է՝ ցուցանիշը կլավանա, որովհետև հիփոթեքային շուկայում տիրող իրավիճակը կբերի այդ արդյունքի:

Կառավարության ղեկավարը համոզված է՝ ճիշտ քաղաքականություն են վարում, որ հիփոթեքային կամ շինարարական ծրագրերը չեն կապում կոնկրետ շինարարի հետ, և շուկան ինքն է կարագավորում:

Վարչապետը նշեց, որ առևտուրն աճել է 9%, ծառայությունները՝ 16.2%: Արտահանումը, ըստ նրա, ամենաուրախալին է, քանի որ մեկ ամիս առաջ աշխատանքային քննարկում էին արել արտահանման իրավիճակի հետ կապված և որոշակի մտահոգիչ միտումներ կային. «Ուրախ եմ, որ ապրիլին 9.9% աճ ենք արձանագրել: Նաև միջին անվանական աշխատավարձերի որոշակի դինամիկա ունենք, որն ավելի դրական կդառնա առաջիկայում ու մասնավոր հատվածում ևս ավելի շոշափելի կնկատվի: Սա մեզ համար առաջիկա ժամանակահատվածի համար պետք է լինի առանցքային խնդիրներից մեկը»:

Մանրամասները՝ տեսանյութում։