ԱԺ-ում «Իմ քայլն» ու ԼՀԿ-ն իրար մեղադրում են մանիպուլյացիաների մեջ ու հիշեցնում՝ իրավիճակ է փոխվել․ ՏԵՍԱՆՅՈՒԹ

««Գնումների մասին» օրենքի նախագծում փոփոխություններ կատարելով ու ՀՀ նախագահի, վարչապետի, ԱԺ նախագահի համար իրականացվող գնումների մասին տեղեկատվությունը հրապարակելով երկրի անվտանգությանը որևէ վտանգի սպառնալիք չի ստեղծվում, այն ընդամենն ապահովում է թափանցիկություն, հետևաբար ես զարմանում եմ, թե ի՞նչ մանիպուլյացիաների եք դուք դիմում»,- այս մասին այսօր Ազգային ժողովում իրենց խմբակցության ներկայացրած օրենսդրական փոփոխությունների նախագիծը ԱԺ լիագումար նիստի օրակարգ չընդգրկելու վերաբերյալ ԱԺ «Իմ  քայլը» խմբակցության պատգամավորների բացասական դիրքորոշմանն ի պատասխան, ասաց  «Լուսավոր Հայաստան» խմբակցության ղեկավար էդմոն Մարուքյանը՝ հիշեցնելով, որ իրենց ներկայացրած փոփոխությունների վերաբերյալ դրական դիրքորոշում է ունեցել դեռևս «Ելք» դաշինքը և ներկայիս վարչապետը։

«Իմ քայլը» խմբակցության պատգամավոր Արփի Դավոյանն էլ Էդմոն Մարուքյանին մեղադրեց մանիպուլյացիաների դիմելու համար։ ««Ելք» դաշինքի արած հայտարարությունները խնդրում եմ այլևս չվկայակոչել, ահագին բան է փոխվել, իրավիճակ է փոխվել»,- ասաց  Դավոյանը։

ԱԺ «Լուսավոր Հայաստան» խմբակցության և «Իմ քայլի» միջև փոխադարձ «հրաձգությանը» միջամտեց ԱԺ «Բարգավաճ Հայաստան» խմբակցության պատգամավոր Տիգրան Ուրիխանյանը՝  հիշեցնելով, որ գործող վարչապետը նախկինում կողմնակից է եղել այդ ծախսերը թափանցիկ դարձնելու օրենսդրական փոփոխություններին, սակայն, քանի որ այժմ քննարկվում է այն հարցը, որ կա անվտանգության խնդիր, իրենց խմբակցությունը կքվեարկի ձեռնպահ։

Ձեռնպահ քվեարկելու մասին հայտարարեց նաև ԱԺ նախագահ Արարատ Միրզոյանը։

Նախագիծը դրվեց քվեարկության և լիագումար նիստերի օրակարգ չընդգրկվեց 15 կողմ, 64 դեմ, 24 ձեռնպահ ձայների հարաբերակցությամբ։

Մանրամասները՝ տեսանյութում։