18.10.2026 | 16:10
Որակյալ կերերից մինչև մաքրացեղ խոզեր․ «Օջախ Ագրո»-ի առաջարկները․ ՏԵՍԱՆՅՈւԹ
Ադրբեջանը ծագումով հայերին շարունակում է օգտագործել քարոզչական նպատակներով
Քաղաքականություն
27.05.2019 | 18:57
Հենրիխ Մխիթարյանի՝ Բաքու չմեկնելու և դրա հետևանքով միջազգային լրատվամիջոցներում ստեղծված հակաադրբեջանական մթնոլորտը մեղմելու համար Ադրբեջանը կրկին դիմում է հին ու փորձված քարոզչական հնարքի՝ օգտագործել տարբեր երկրներում ապրող ծագումով հայերին՝ ցույց տալով, որ Ադրբեջանում անվտանգ է հայերի համար և չկա որևէ սպառնալիք:
Բաքվում այս օրերին ընթանում է Մարմնամարզության Եվրոպայի առաջնությունը, որին Ռուսաստանի հավաքականի կազմում մասնակցում են նաև հայազգի Գարսևան ու Դուխիկ Ջանազյանները: Ադրբեջանական հեռուստաալիքներից մեկը նրանց հետ հարցազրույց է հրապարակել, որում հայազգի մարզիկները նշում են, որ Բաքուն շատ գեղեցիկ քաղաք է, բնակիչներն էլ՝ շփվող, կենսախինդ ու ընկերասեր։
«Այստեղ ամեն ինչ հարմարավետ է ու անվտանգ, ամեն ինչ պարզապես հիանալի է»,- նշում է Գարսևան Ջանազյանը։
Դուխիկն էլ ասում է, որ հատկապես Բաքուն շատ է հավանել. «Բաքուն գեղեցիկ է, հատկապես այն հակադրությունը, որ կա քաղաքի ժամանակակից և պատմական հատվածների միջև։ Կարծես հայտնվում ես այլ դարաշրջանում։ Սպորտը սպորտ է, քաղաքականությունը՝ քաղաքականություն»:
Նշենք, որ առաջին անգամ չէ, որ Բաքուն ծագումով հայերին օգտագործում է իր քարոզչական նպատակներով, հատկապես՝ ադրբեջանական կողմի ստեղծած, այսպես կոչված, «Հայաստանի և Ադրբեջանի միջև խաղաղության քաղաքացիական պլատֆորմի» մասին, որի շրջանակում տարբեր հայեր են այցելել Ադրբեջան։ Ի դեպ՝ այս պլատֆորմում ընդգրկված են միայն Բաքվի կողմից հատուկ ընտրված հայերը, բոլորը՝ Հայաստանից դուրս ապրող:
2018 թվականին, օրինակ, Բաքու էր այցելել ռուսաստանաբնակ Իրինա Բերչիյանը՝ ազգությամբ ադրբեջանցի ամուսնու հետ: Նրանց այցի մասին տեղական հեռուստաալիքներց մեկը դարձյալ ցուցադրական ռեպորտաժ էր պատրաստել:
Պաշտոնական Բաքվի նման պահվածքը նորություն չէ, և Հենրիխ Մխիթարյանի շուրջ ստեղծված իրավիճակին, քննադատություններին Ադրբեջանն այս անգամ փորձում է դիմակայել՝ օգտագործելով ռուսաստանաբնակ հայ մարզիկներին:
Էմմա Չոբանյան
