Օպերային արտիստները՝ ընդդեմ թատրոնի կառավարման խորհրդում Նազենի Ղարիբյանի պաշտոնավարման. ՏԵՍԱՆՅՈՒԹ

Նազենի Ղարիբյանը պետք է կապ չունենա ոչ միայն Օպերային թատրոնի հետ, այլև մշակույթի ամբողջ ոլորտի: Ալ.Սպենդիարյանի անվան օպերայի և բալետի ազգային ակադեմիական թատրոնում հրավիրված ժողովի ընթացքում այս մասին ասացին թատրոնի աշխատակիցները:

Նրանց պահանջը մայիսի 22-ին կայացած «Ալ.Սպենդիարյանի անվան օպերայի և բալետի ազգային ակադեմիական թատրոն» ՊՈԱԿ-ի կոլեգիալ կառավարման մարմնի խորհրդի հերթական նիստի ընթացքում թատրոնի կառավարման խորհրդի նախագահի և քարտուղարի ընտրության արդյունքների չեղարկումն է:

«Կառավարման խորհուրդը բաղկացած է ութ հոգուց, որի կազմում թատրոնն ունի 2 անդամ, Մշակույթի նախարարությունը՝ 4, 2 անդամ էլ՝ ստեղծագործական միություններից»,- նշեց օպերային թատրոնի մեներգիչ Պերճ Քարազյանը:

Քարազյանն ու բալետի արտիստ Սերգեյ Սաֆարյանը կառավարման խորհրդում օպերային թատրոնի աշխատակազմի ներկայացուցիչներն են: Այսօրվա ժողովին, սակայն, գործընկերներից շատերը նրանց հասցեին «դավաճան» էին վանկարկում:

«Ուղղակի աբսուրդային է, որ դուք, լինելով մեր գործընկերները և կառավարման խորհրդում մեր ներկայացուցիչները, ձեր ձայնը Նազենի Ղարիբյանին եք տվել»,- տարակուսեց դիրիժոր Հարություն Արզումանյանը:

Մեկ ժամից ավելի տևած քննարկման արդյունքում թատրոնի աշխատակիցները որոշեցին առաջիկա օրերին կառավարման խորհրդի նոր ընտրություն անցկացնել: Օպերային արտիստները նշեցին, որ չեն պատրաստվում աշխատել կառավարման խորհրդի այնպիսի նախագահի հետ, որն անգամ իրենց պրեմիերաներին ներկա չի լինում:

Բացի այդ՝ կանցկացվի ևս մեկ ընտրություն՝ կապված խորհրդի կազմում իրենց ներկայացուցիչների հետ:

Հիշեցնենք, որ մայիսի 22-ին կայացել է «Ալ.Սպենդիարյանի անվան օպերայի և բալետի ազգային ակադեմիական թատրոն» պետական ոչ առևտրային կազմակերպության կոլեգիալ կառավարման մարմնի խորհրդի նիստը, որի ընթացքում անցկացված քվեարկության արդյունքներով՝ ՊՈԱԿ-ի կառավարման խորհրդի նախագահ է ընտրվել ՀՀ մշակույթի նախարարի պարտականությունները կատարող Նազենի Ղարիբյանը, իսկ խորհրդի քարտուղար՝ թատրոնի բալետի արտիստ Սերգեյ Սաֆարյանը:

Մանրամասները՝ տեսանյութում:

Նելլի Մելքոնյան