20.04.2026 | 14:05
Ռուսական ԱԹՍ-ների հարձակումից վիրավորվել է Ուկրաինայի պաշտպանության նախարարի խորհրդականը
90 օր առանց վիզայի․ Հայաստանն ու Չինաստանը վերացնում են մուտքի արտոնագիրը․ ՏԵՍԱՆՅՈՒԹ
Քաղաքականություն
23.05.2019 | 13:18
Կառավարության մայիսի 23-ի նիստում գործադիրը հավանություն տվեց «Հայաստանի Հանրապետության կառավարության և Չինաստանի Ժողովրդական Հանրապետության կառավարության միջև սովորական անձնագրեր ունեցող անձանց համար մուտքի արտոնագրի պահանջի փոխադարձաբար վերացման մասին» համաձայնագրի ստորագրման առաջարկությանը:
Ըստ նախագծի՝ մինչև 90 օր քաղաքացիները կկարողանան ազատ այցելություններ իրականացնել, իսկ միգրացիոն ծառայությունները կհամագործակցեն առանց վիզայի ռեժիմը չարաշահող քաղաքացիներին իրենց երկիր վերադարձնելու համար:
Անդրադառնալով հայ-չինական հարաբերություններին՝ վարչապետ Փաշինյանը նշեց, որ Հայաստանը Չինաստանի հետ ունի «Մեկ գոտի, մեկ ճանապարհ» ծրագրով ձեռք բերված պայմանավորվածություններ և հիմա ժամանակն է այդ կոնկրետ պայմանավորվածություններն իրագործելու։
Վարչապետի խոսքով՝ հանդիպումների ընթացքում Չինաստանի ղեկավարությունն ամենաբարձր մակարդակով հավաստիացրել է, որ իրենք շահագրգռված են չինական շուկան հայկական ապրանքների համար հասանելի դարձնելու հարցով, այդ թվում՝ գինիների, ալկոհոլային խմիչքների, սննդի և այլ ապրանքների արտահանման ուղղությամբ։
«Որևէ կասկած չկա, ես վստահեցնում եմ, որ Չինաստանի շուկան մեր ապրանքների համար բաց է, և մեր գործարարները կարող են զբաղվել դրանով: Միակ խնդիրը, որ կա, այն է, որ կան որոշակի ստանդարտներ, և մեր գործարարները պետք է կարողանան համապատասխանել այդ ստանդարտներին»,- ասաց նա։
Կրթության և գիտության նախարար Արայիկ Հարությունյանն էլ նշեց, որ Չինաստանից լուրջ առաջարկներ կան արհեստական բանականության ոլորտում համագործակցության ուղղությամբ, որ դա ներդնեն մեր կրթական ոլորտում։
«Չինաստանն այս ոլորտում առաջատարներից մեկն է, նաև առաջարկ կա չինարենը՝ որպես օտար լեզու մեր դպրոցներում դասավանդելու ծրագիր ներդնել։ Այնպես որ, լավ զարգանում են հարաբերությունները»,- ասաց նախարարը:
Մանրամասները՝ տեսանյութում։
