18.09.2026 | 07:58
Փաշինյանն աշխատանքային այցով մեկնել է Գերմանիա․ նրան կշնորհվի Հեսսեյան Խաղաղության մրցանակը
Վանաձորի ԲԿ-ի տնօրենի պաշտոնի համար դիմած 3 թեկանծուներից 2-ը մրցույթին չեն ներկայացել
Հասարակություն
22.05.2019 | 20:57
Այս տարվա հունվարի 14-ին սեփական դիմումի համաձայն աշխատանքից ազատվեց Վանաձորի բժշկական կենտրոնի տնօրեն Վարդան Աբովյանը:
Հաջորդ իսկ օրվանից Լոռու մարզպետ Անդրեյ Ղուկասյանի առաջարկով հիվանդանոցի տնօրենի ժամանակավոր պաշտոնակատար նշանակվեց Վահագն Մկրտչյանը:
Մայիսի 21-ին անցկացվեց կենտրոնի տնօրենի պաշտոնի համար հայտարարված մրցույթը:
Դիմել էին 3 թեկնածուներ՝ Անուշավան Նիկողոսյանը, Աշոտ Ամիրյանը և Վահագն Մկրտչյանը:
Թեև մրցույթին մասնակցելու համար համապատասխան փաստաթղթեր էին ներկայացրել բոլորը, սակայն, Լոռու մարզպետարանում անցկացված մրցույթին Անուշավան Նիկողոսյանն ու Աշոտ Ամիրյանը չեն ներկայացել:
Մրցույթին մասնակցել է միայն տնօրենի ժամանակավոր պաշտոնակատարը. «Իրենք ծանուցված են եղել, բայց մենք իրենցից ոչ մի տեղեկություն չունեինք, սպասեցինք, սակայն չեկան: Եվ չներկայանալու պատճառով իրենք դուրս են մնում մրցույթից»,- ասաց Լոռու մարզպետարանի առողջապահության և սոցիալական ապահովության վարչության պետ Արթուր Մխիթարյանը: Հանձնաժողովի կազմում ընդգրկված են եղել մարզպետարանի տարբեր վարչությունների 7 ներկայացուցիչներ: Մրցույթը բաղկացած է եղել մի քանի փուլից: Մխիթարյանի վստահեցմամբ՝ Մկրտչյանը հաղթահարել է նախատեսված բոլոր փուլերը.
«Առաջին հատվածում թեկնածուները պատասխանում են թեստային հարցերին: Կա 50 թեստ, որոնց պատասխաններից ելնելով, որոշվում է՝ անցնում է թեկկնածուն հաջորդ փուլ, թե ոչ: Այս պարագայում Վահագն Մկրտչյանը պատասխանել է թեստային հարցերին, անցել հաջորդ փուլ: Այդ փուլում բանավոր 5 հարցեր են, դրանից հետո զարգացման ծրագրի ներկայացումն է, այսինքն թեկնածուները ներկայացնում են նախնական 5 տարվա զարգացման պլան: Հանձնաժողովի անդամներից 7-ն էլ կողմ են քվեարկել Մկրտչյանին: Ըստ օրենքի 3 աշխատանքային օրվա ընթացքում մարզպետը կնշանակի տնօրենին»:
Տաթևիկ Ղազարյան
