ՍԴ դատավորի նոր թեկնածուն հանդիպել է «Իմ քայլի» հետ, դատարանների մուտքերը փակելու հետ կապված ուշագրավ հայտարարություն արել

Ազգային ժողովում այսօր տեղի է ունեցել «Իմ քայլը» խմբակցության և Սահմանադրական դատարանի անդամի նոր թեկնածու Արթուր Վաղարշյանի փակ հանդիպումը:

Factor.am-ի ունեցած այս տեղեկությունը հաստատեց «Իմ քայլը» խմբակցության պատգամավոր Արփի Դավոյանը: Նա նշեց, որ հանդիպումը եղել է խմբակցության նախաձեռնությամբ: Պատգամավորը, մանրամասնելով հանդիպումը, նշեց, որ ՍԴ դատավորի թեկնածուին բազմաբնույթ հարցեր են տվել: Մինչև անգամ հետաքրքրվել են, թե ովքեր են իր բարեկամները, ինչ կապեր ունի, և, եթե վեթինգ կիրառվի, նա ինչ-որ խնդիրներ կունենա՞:

Արփի Դավոյանն ասաց, որ Արթուր Վաղարշյանը վստահեցրել է, թե որևէ խնդիր չի ունենա:

Ի դեպ, Արթուր Վաղարշյանը նաև մեկ ուշագրավ հայտարարություն է արել հանդիպման ժամանակ: Նա, մասնավորապես, ասել է, որ դատարանների մուտքերը փակելու Նիկոլ Փաշինյանի կոչը հակասահմանադրական չէ:

«Ես հարցրեցի, թե նա, որպես ՍԴ դատավորի թեկնածու, ինչպե՞ս է վերաբերվում վարչապետի հայտարարությանը, քանի որ շատ մասնագետներ այն որակում են հակասահմանադրական: Թեկնածուն պատասխանեց, որ վարչապետի հայտարարությունը հակասահմանադրական չէ»,- պատմեց պատգամավորը:

Factor.am-ի հարցին՝ պատգամավորները հետաքրքրվե՞լ են, թե նա ինչ կարծիք ունի, որ Ռոբերտ Քոչարյանի և մյուսների գործը կասեցվել ու ուղարկվել է ՍԴ, պատգամավորը պատասխանեց, որ այդ թեմային չեն անդրադարձել:

Հիշեցնենք, որ Ազգային ժողովը մեկ տարի է՝ չի կարողանում ընտրել Սահմանադրական դատարանի դատավոր: Մինչ այս՝ 6-րդ և 7-րդ գումարման խորհրդարաններին Սահմանադրական դատարանի դատավորի թափուր տեղի համար առաջադրվել էին Էմիլ Բաբայանը, Ելիզավետա Դանիելյանը, Վահե Գրիգորյանը և Գոռ Հովհաննիսյանը:

ՍԴ դատավոր ընտրվելու համար անհրաժեշտ է պատգամավորների 3/5-ի կամ 63-ի կողմ քվեն: Հավելենք, որ իշխող ուժն այդ պաշտոնին հակված է տեսնել փաստաբան Վահե Գրիգորյանին:

Նարեկ Կիրակոսյան