Գեորգի Ավետիսյանը՝ Սննդամթերքի անվտանգության տեսչական մարմնի սայթաքումների մասին

Սննդամթերքի անվտանգության տեսչական մարմնում ներդրվել է այնպիսի համակարգ, որը թույլ է տալիս անասնաբուժության ոլորտում առավել պրոֆեսիոնալ կադրեր ունենալ։

Այս մասին այսօր հրավիրված ասուլիսի ժամանակ ասաց ՍԱՏՄ ղեկավար Գեորգի Ավետիսյանը՝ ներկայացնելով անցնող տարում ՍԱՏՄ կատարած աշխատանքը։

Նրա խոսքով՝ իրենք որոշել են անասնաբույժի օրը նշել, հանրայնացնել՝ դրանով առաջացնելով հետաքրքրություն ոլորտի նկատմամբ։ Ավետիսյանը նաև հավելեց՝ կա կադրերի և որակյալ մասնագետների պակաս։ «Կասեք, որ սնունդը դրանից չի դառնա անվտանգ, իսկ ինձ համար կարևոր է, որ այսօրեական ևս մեկ խնդիր լուծելով՝ մենք մեր աշխատանքը որակյալ և կարևոր չենք դարձնի»,- ասաց Գեորգի Ավետիսյանը։

Նրա փոխանցմամբ՝ ՍԱՏՄ-ի համար հաջորդ խնդիրը վերահսկողության անուղղակի մեխանիզմների ստեղծումն է, որոնց մեջ մտնում է  այդ մարմնի համագործակցությունը հանրային սեկտորի և լրատվամիջոցների հետ. «Մենք կարող ենք բոլորին դիտարկել որպես մեզ գործընկեր և համագործակցել նրանց հետ։ Սակայն, բարդանում է խնդիրը նրանով, որ մեկ սայթաքում պետական մարմնի կողմից կբերի նրան, որ մենք վստահությունը կկորցնենք, իսկ առանց վստահության ի՞նչ գործընկերություն, առանց գործընկերության ի՞նչ վերահսկողություն»։

Որպես իր ղեկավարած ծառայության սայթաքում Գեորգի Ավետիսյանը նշեց ծառայության աշխատողների կողմից կաշառք վերցնելու հնարավոր դեպքերը:

«Սայթաքումների մեկը կամայական աշխատակցի կողմից կաշառք վերցնելն է։ Այս պարագայում ուզում եմ նշել, որ իմ մեկ տարվա ընթացքում բազմիցս խոսել եմ աշխատակիցների հետ և բազմիցս առաջարկել եմ իրենց դնել հակառակ մարդու տեղը. արդյոք նրանց դուր կգա՞, որ որևէ պաշտոնյա գումար վերցնի չաշխատելու դիմաց»,- ասաց նա։