16.01.2026 | 20:45
Եպիսկոպոսը դատի է տվել Մայր Աթոռին, կաթողիկոսը՝ սառեցրել թեմի հաշիվները. ՏԵՍԱՆՅՈՒԹ
Մայիսի 20-ին տեղի ունեցած դեպքերի ազդեցությունը Հայաստանի վարկանիշի վրա առավելապես կախված կլինի իշխանությունների հետագա քայլերից․ Թևան Պողոսյան
Քաղաքականություն
22.05.2019 | 15:26
Մարդկային զարգացման միջազգային կենտրոնի նախագահ Թևան Պողոսյանն այսօր հրավիրված մամուլի ասուլիսի ժամանակ անդրադարձավ վարչապետ Փաշինյանի կոչով դատարանների մուտքերն արգելափակելու կոչին և դրա վերաբերյալ ԵԽԽՎ համազեկուցողների ու ԱՄՆ դեսպանատան արձագանքներին:
«Եթե հետագա քայլերը լինեն օրինական, թափանցիկ, հաշվետու, մշակվի հայեցակարգ, ռազմավարություն, ընդգրկուն մեխանիզմներով բարեփոխումներն առաջ տարվեն, ապա դա օրինակելի կլինի, իսկ եթե այս ամենը չապահովենք, կլինեն այլ գնահատականներ»,- նշեց Պողոսյանը:
Վերջինիս խոսքով՝ ԵԽԽՎ և ԱՄՆ դեսպանատան արձագանքը մայիսի 20-ին տեղի ունեցած իրադարձություններին, եղել են որպես արձագանք հնչած առաջարկություններին։
«Հասարակությունում մի թյուրիմացություն կա, թե որ արձագանքն է ավելի ուժեղ, բայց քաղաքական դաշտը և պետական ինստիտուտները կոչով էին հանդես գալիս մինչև երկուշաբթի առավոտյան ժամը 12-ը: Այս կառույցներն արձագանքել են առաջարկված փոփոխություններից հետո: Հասկանալի է, որ նրանք ողջունում են բարեփոխումները, հասկանում են, որ ՀՀ դատական համակարգն ունի խնդիրներ, որոնք պետք է միասնական հաղթահարենք, ողջունում են դատական համակարգի բարեփոխումների ցանկությունը և կոչ են անում ամեն ինչ անել օրենքի շրջանակներում, համաձայն մեր ստանձնած պարտավորությունների: Մեկ ամիս անց այլ կառույցի կոչը գուցե այլ լինի»,- նկատեց Մարդկային զարգացման միջազգային կենտրոնի նախագահը։
Թևան Պողոսյանը միևնույն ժամանակ նշեց, որ դժվար է գտնել մեկին, ով դրական կգնահատի իշխանության կողմից դատարանների մուտքերը փակելու կոչերը, քանի որ դատական իշխանությունն ինքնին առանձին իշխանություն է, և մեր երկրում երեք իշխանություններն էլ՝ օրենսդիր, գործադիր և դատական, ձևավորվում են ՀՀ Սահմանադրության համաձայն, միմյանցից անկախ են և ունեն համապատասխան փոխվերահսկողության մեխանիզմներ:
«Դրանում է ժողովրդավարությունը: Եվ դրական իմաստով ընկալում չէր կարող լինել»,- ասաց նա:
Պողոսյանը նաև նշեց, որ եթե որոշվում է, որ մի բան է արվելու, բայց այն չի համապատասխանում Սահմանադրությանը կամ օրենքներին, պետք է քննարկել, թե ինչ փոփոխություններ արվեն օրենսդրական դաշտում կամ Սահմանադրությունում․ եթե կա անհրաժեշտություն, ապա պետք է նաև անցկացվի հանրաքվե, բայց ամեն ինչ պետք է լինի օրենքի շրջանակներում, որ ընկալելի լինի և՛ մեզ, և՛ միջազգային հանրության համար։
«Հայաստանը ԵԽ անդամ է, տարբեր միջազգային կառույցներում ունենք ստանձնած պարտավորություններ և այդ ոգով ու շնչով պետք է առաջնորդվենք: Ուրախ եմ, որ մտնում ենք օրենսդրական դաշտ, կլինեն քննարկումներ: Չպետք է պրիմիտիվ ձևով կրկնել ուրիշ երկրների փորձը»,- ասաց նա։
