Պարոն Սարգսյանն ասում է՝ օնլայն, օնլայն, բայց օնլայնի մասին զրո առաջարկ կա. Ալեն Սիմոնյան. ՏԵՍԱՆՅՈՒԹ

63 հազար մարդ տարված է վիճակախաղերով, որոնցից 3 հազարը մոլի խաղացողներ են: Այս մասին այսօր՝ մայիսի 22-ին ԱԺ տնտեսական հարցերի մշտական հանձնաժողովի նիստում «Վիճակախաղերի մասին» օրենքի փոփոխությունների նախագծի քննարկման ժամանակ նշեց նախաձեռնության հեղինակներից ԱԺ փոխնախագահ Ալեն Սիմոնյանը:

«Բուքմեյքերական գրասենյակներում ոչ մասնագիտական գործունեությամբ զբաղված է ընդամենը 1.345 մարդ: Մենք այս հարցը մեկ տարի քննարկում ենք, դեռ մի տարի էլ կձգվի, իրենք կկարողանան իրենց համար աշխատանք գտնել: Իսկ այն մարդիկ, որոնք իրենց բնակարանները տարվել են, դժվար թե կարողանան հետ բերել: Այսինքն՝ այստեղ մի կողմում 1.350 մարդ է, մյուս կողմում՝ 63 հազար: Պարոն Սարգսյանը (խոսքը «Իմ քայլը» խմբակցության պատգամավոր Հայկ Սարգսյանի մասին է – խմբ.) այստեղ անընդհատ ասում է՝ օնլայն, օնլայն, բայց արդեն ինչքան ժամանակ է՝ քննարկում ենք հարցը, և զրո առաջարկ է եղել օնլայնի հետ կապված, որովհետև ժամանակակից աշխարհում հնարավոր չէ դա փակել»,- ասաց Ալեն Սիմոնյանը:

Նա ընդգծեց, որ եթե քննադատում են օնլայն խաղադրույք անելը, պետք է հասկանալ, որ «օնլայն դաշտը վերահսկելի է ծավալների առումով, վերահսկելի է նիսյայի առումով, վերահսկելի է նաև տարիքային առումով»:

Նշենք, որ «Իմ քայլի» պատգամավոր Հայկ Սարգսյանը նշել է, որ պետք է պայքարել առաջին հերթին օնլայն տիրույթում մոլախաղերի դեմ, որովհետև այն 80 տոկոսն է կազմում: Նա նաև առաջարկել է մեկ տարով հետաձգել բուքմեյքերական «բեթշոթերը» փակելու դրույթի կիրառումը: Ալեն Սիմոնյանն այս առաջարկին համաձայն չէ:

Մանրամասները՝ տեսանյութում:

Նարեկ Կիրակոսյան