Նախկինում մենք չենք տեսել դեպքեր, որ ԱԱԾ տնօրենը այդքան սերտ համագործակցի քրեական հեղինակությունների հետ․ ՏԵՍԱՆՅՈՒԹ

Նախկինում մենք չենք տեսել դեպքեր, որ Ազգային անվտանգության ծառայությունը կամ ծառայության տնօրենն այդքան սերտ համագործակցության մեջ լինի քրեական հեղինակությունների հետ: Այո՛, նախկինում համագործակցություն եղել է, բայց ոչ թե տնօրենի, այլ ավելի ցածր չինովնիկների մակարդակով։

Այս մասին այսօր «Ազգային անվտանգության ծառայության դերն ու նշանակությունը. ի նպաստ ո՞ւմ է օգտագործվում վարչական ռեսուրսը» թեմայով քննարկման ժամանակ ասաց «Իրազեկ քաղաքացիների միավորման» ծրագրերի համակարգող Դանիել Իոաննիսյանը։

«Երբ ունես մի իրավիճակ, երբ ավելի ցածր մակարդակի չինովնիկներից մեկը, որը, ըստ ամենայնի, զբաղվել է քրեական հեղինակությունների հետ համագործակցությամբ, դարձել է ԱԱԾ տնօրեն, ականատես ես լինում, թե ինչպես է նման համագործակցությունը ստացվում։ Վստրեչի Ապեր, Վովայի Արշակ, Թոխմախի Բաբո․ այդ մարդիկ հիմա իրենց ավելի ազատ են զգում, քան նախկինում։ Այդ մարդիկ Երևանի Էրեբունի վարչական շրջանից են: Ուզում եմ հիշեցնել, որ Արթուր Վանեցյանն էլ նախկինում ԱԱԾ Էրեբունու բաժնում է աշխատել և դեռ այն ժամանակներից, ըստ շրջանառվող լուրերի, բավականին մտերիմ հարաբերություններ ունի նրանց հետ։ Կրկնում եմ՝ երբեք  ինձ մոտ չի եղել էնպիսի տպավորություն, որ ԱԱԾ տնօրենը համագործակցի քրեական հեղինակությունների հետ»,- ասաց Իոաննիսյանը։

«Իրազեկ քաղաքացիների միավորման» ծրագրերի համակարգողը նշեց, որ վերահաստատում է իր այն պնդումը, որ Հայաստանում ընթացող ժողովրդավարական գործընթացները պահանջում են, որ Ազգային անվտանգության ծառայության լիազորությունները փոխվեն և ԱԱԾ-ն մնալով փակ կառույց պետք է զբաղվի հետախուզությամբ և հակահետախուզությամբ։

Մանրամասները՝ տեսանյութում։