Տնտեսություն
20.05.2019 | 17:40
ՀՀ գյուղատնտեսության նախարարի տեղակալ Գառնիկ Պետրոսյանն այսօր տեղի ունեցած մամուլի ասուլիսի ընթացքում ներկայացրել է բուսաբուծության ոլորտում իրականացվող պետական օժանդակության ծրագրերը, անդրադարձել լոլիկի հարավ-ամերիկյան ցեցի դեմ պայքարի աշխատանքներին, ինչպես նաև խորհուրդներ տվել գյուղացիական տնտեսություններին ընթացիկ տարվա բնակլիմայական գործոններով պայմանավորված բույսերի պաշտպանության լրացուցիչ միջոցառումներ իրականացնելու անհրաժեշտության վերաբերյալ։
Ըստ Պետրոսյանի՝ ինտենսիվ այգիների հիմնման, կաթիլային համակարգերի և կարկտապաշտպան ցանցերի ներդրման ծրագրերում այս տարի փոփոխություններ են կատարվել, որի ծրագրերը մեկնարկել են նախորդ տարի։
Պաշտոնյայի խոսքով՝ այդ աշխատանքների թվում հանվել է աշխատանքները կապալառու կազմակերպությունների միջոցով իրականացնելու պարտադիր պայմանը, ինտենսիվ այգիների դեպքում՝ բացի պտղատու այգիներից և հատապտղանոցներից, շահառուներին նաև խաղողի այգիների հիմնման հնարավորություն է տրվել, հանվել է նաև կարկտապաշտպան ցանցերի պարտադիր առկայության պայմանը։
«Միաժամանակ երկարաձգվել է վարկի մայր գումարի մարման ժամկետը, էականորեն իջեցվել է տոկոսադրույքը, այժմ վարկը տրամադրվում է 2 % տոկոսադրույքով, 8 տարի մարման ժամկետով, որից 5 տարին՝ արտոնյալ, որի ընթացքում մայր գումարի մարումներ չեն կատարվում։ Բացի այդ, այժմ շահառուները հնարավորություն ունեն ոչ միայն վարկ վերցնել ինտենսիվ այգիների հիմնման և կաթիլային ոռոգման համակարգի ներդրման համար, այլև օգտվել գումարի հետվերադարձի տարբերակից։ Արդյունքում՝ արդեն ունենք 12 հա ինտենսիվ այգիների ներդրման համար կնքված վարկային համաձայնագրեր, 8 շահառուներ դիմել են փոխհատուցման տարբերակից օգտվելու համար, որոնցից 5-ի հայտերը բավարարվել են»,- նշել է Պետրոսյանը։
Անդրադառնալով գյուղոլորտի խնդիրներին՝ Գառնիկ Պետրոսյանը կարևորել է լոլիկի հարավ-ամերիկյան ցեց վնասատուի դեմ պայքարը և ջերմատան պայմաններում առկա են ցեցի տարածումը կանխելու բազմաթիվ մեթոդներ, իսկ բաց գրունտի համար մշակվել է ծրագիր, ձեռք են բերվել ֆերոմոնային թակարդներ, որոնք ներկայումս տեղադրվում են Արարատի և Արմավիրի մարզերում, փորձնական նմուշներ կտրամադրվեն նաև այլ մարզերում:
«Բացի այդ, Հայաստանի ազգային ագրարային համալսարանի հետ համատեղ Արարատի Ոսկետափ և Արմավիրի Ակնալիճ համայնքներում իրականացվում է ցեցի դեմ պայքարի համալիր միջոցառումների պիլոտային ծրագիր: Փոխնախարարը կոչ է արել ճիշտ ժամանակին ձեռնարկել վնասատուի դեմ պայքարի միջոցառումները, ինչը թույլ կտա խուսափել բերքի կորստից և ապահովել կայուն իրավիճակ։ Միաժամանակ նա շեշտել է, որ վնասատուի զարգացումն անհնար է կասեցնել մեկ գործողությամբ. արդյունավետ պայքարը հնարավոր է ապահովել միմիայն համալիր միջոցառումներ ձեռնարկելով` սկսած նախորդ տարվա աշնանից մինչև վաղ գարնան ժամանակահատվածի և ամբողջ վեգետացիայի ընթացքում,- ասաց նա։
