16.11.2024 | 22:58
«Մանկական Եվրատեսիլ – 2024»-ում հաղթեց Վրաստանը
Ընտրությունները Վրաստանում. իշխող ուժի բացարձակ հաղթանակը
Քաղաքականություն
20.05.2019 | 15:23
Մայիսի 19-ին Վրաստանում տեղի ունեցան միջանկյալ և արտահերթ ընտրություններ, որոնց նախնական արդյունքների համաձայն՝ գրեթե բոլոր ընտրատարածքներում բացարձակ հաղթանակ են տանում իշխող «Վրացական երազանք» կուսակցության թեկնածուները:
Իշխող ուժի թեկնածուները քաղաքապետի մանդատ կստանան Զուգդիդիում, Մառնեուլիում, Զեստաֆոնիում, Ճիաթուրայում և Խուլոյում:
Թեժ պայքար էր ընթանում հատկապես Զուգդիդիում, որտեղ քաղաքապետի պաշտոնի համար ընդդիմությունն առաջադրել էր Վրաստանի նախկին նախագահ Միխեիլ Սաակաշվիլիի տիկնոջը՝ Սանդրա Ռուլոֆսին։ Վերջինս ստացել է ձայների 42 տոկոսը, հաղթել է իշխող կուսակցության թեկնածու Գիորգի Շենգելիան՝ 54 տոկոսով:
Մառնեուլիում 90 ընտրատեղամասից ստացված տվյալների համաձայն ձայների 78,6 տոկոսով առաջին տեղում է «Վրացական երազանք»-ի ներկայացուցիչ Զաուր Դարգալին: Ընդդիմադիր «Միացյալ ազգային շարժման» թեկնածու Ագիլ Մուստաֆաևը ստացել է քվեների մոտ 11 տոկոսը։
Խուլոյում ձայների 70,91 տոկոսով հաղթող է ճանաչվել իշխող կուսակցության թեկնածու Վախթանգ Բերիձեն:
Ճիաթուրայում նույնպես հաղթանակը «Վրացական երազանքինն» է․ Գիվի Մոդեբաձեն հավաքել է ձայների 64,58 տոկոսը:
Վրաստանի ԿԸՀ-ի տվյալներով, Զեստաֆոնիում առաջնորդում է իշխող կուսակցության թեկնածու Գիորգի Գոգլիչիձեն՝ 50,7 տոկոսով:
Ինչ վերաբերում է Թբիլիսիին, այստեղ Վրաստանի նախագահ ընտրվելուց հետո Սալոմե Զուրաբիշվիլին ազատեց Մթածմինդայի թաղամասի մեծամասնական պատգամավորի մանդատը: Նախնական տվյալներով այստեղ ևս առաջատար է «Վրացական երազանք» կուսակցությունը՝ Լադո Կախիձեն՝ 41 տոկոսով, սակայն, երկրորդ փուլը Մթածմինդայի ընտրատարածքում անխուսափելի է։ Այդ մասին ասել է նաև վարչապետ Մամուկա Բախտաձեն։
Հարկ է նշել, որ ԿԸՀ-ի տվյալների համաձայն, ընտրություններում ամենաբարձր ակտիվությունը գրանցվել է Սագարեջոյում, ամենացածրը՝ Մթածմինդայում:
Այսպիսով Վրաստանում մայիսի 19-ին կայացած արտահերթ ընտրությունների արդյունքում քաղաքապետ են ընտրել Զուգդիդիում, Մառնեուլիում, Խուլոյում, Ճիաթուրայում և Զեստաֆոնիում: Միջանկյալ ընտրություններ են տեղի ունեցել Մթածմինդայում: Զուգահեռ միջանկյալ ընտրություններ են տեղի ունեցել շրջանային սակրեբուլոներում՝ Սագարեջոյում, Ախմետայում, Ադիգենիում, Օզուրգեթիում, Ճիաթուրայում, Տկղիբուլիում, Ծկղալտուբոյում և Զեստաֆոնիում:
