07.03.2026 | 22:11
Նոր նշանակումներ՝ մարմնամարզության Հայաստանի հավաքականներում
100-ից ավելի բաց թանգարան՝ մինչև կեսգիշեր. Հայաստանում վաղը կնշվի Թանգարանների միջազգային օրը
Հասարակություն
17.05.2019 | 18:25
Բաց թանգարաններ՝ առավոտյան 11:00-ից մինչև կեսգիշեր. վաղը Հայաստանում ու Արցախում համատեղ կնշեն Թանգարանային գիշերն ու Թանգարանների միջազգային օրը: Մշակութասեր հասարակությունն Արցախում՝ 7-րդ, իսկ Հայաստանում արդեն 16-րդ անգամ մայրաքաղաքի ու մարզերի 100-ից ավելի թանգարաններ անվճար այցելելու հնարավորություն կունենա:
«Այդ օրը պիտի լինի տոնական և, չնայած մեծ հերթերին, դժվարությամբ ներս մտնելուն ու թանգարանային առարկաներին մոտենալուն, թանգարանները պիտի մարդաշատ լինեն և տոնական պիտի անցնի։ Նաև նշեմ, որ պետական պաշտոնյաներ նույնպես այցելելու են թանգարաններ։ Պիտի տոն լինի»,- նշում է մշակույթի նախարարի տեղակալ Տիգրան Գալստյանը։
Թանգարանների միջազգային օրն այս տարի անցկացվելու է «Թանգարանները որպես մշակութային հանգույցներ. ավանդույթի ապագան» խորագրի ներքո:
Մշակույթի փոխնախարար Տիգրան Գալստյանի խոսքով՝ նախորդ տարի թանգարանային գիշերն այցելությունների ռեկորդային թիվ է գրանցել՝ մեկ միլիոնից ավելի։ Այժմ փորձում են անել այնպես, որ թիվն ավելանա: Դրա համար թանգարանները փորձում են հասանելի դարձնել նաև հաշմանդամություն ունեցող անձանց համար:
«Պատմության թանգարանում ընթանում են շինարարական աշխատանքներ, այնտեղ տեղադրվում է հաշմանդամություն ունեցող անձանց համար վերելակ, սանհանգույց, ինչպես նաև գիդերը պետք է հարմարեցված լինեն հաշմանդամություն ունեցող անձանց»,- ընդգծում է Մշակույթի նախարարի տեղակալը։
Տիգրան Գալստյանի խոսքով՝ Պատմության թանգարանը հաշմանդամություն ունեցող անձանց համար բաց կլինի արդեն մայիսի վերջին, հաջորդ տարվանից կսկսեն աշխատել նաև մյուս թանգարանների ուղղությամբ:
Ալ. Սպենդիարյանի տուն-թանգարանի տնօրեն Մարինե Օթարյանն էլ նշեց, որ այս տարի Թանգարանային գիշերն իրենց թանգարանում նոր ձևաչափ է գործելու՝ թանգարան պատերից դուրս։
«Սա նաև մի փոքր ուղղորդում կլինի՝ հասարակություն-թանգարան։ Այդպես թանգարանի այցելուներին կհիշեցնենք, թե որտեղ է գտնվում թանգարանը, ինչ գործունեություն է ծավալում։ Իսկ թանգարանային արժեքներին ծանոթանալու համար նրանք կարող են այլ օր գալ, որպեսզի գտնվեն թանգարանային միջավայրում և վայելեն այն»,- նշում է Ալ. Սպենդիարյանի տուն-թանգարանի տնօրեն Մարիամ Օթայանը։
Չարենցի անվան գրականության և արվեստի թանգարանի տնօրեն Կարո Վարդանյանն էլ շտապում է հայտնել այցելուներին սպասվող հետաքրքիր նորության մասին. վաղը այցելուները հատուկ պաստառի միջոցով հնարավորություն կունենան հայտնվել «Խաթաբալա» ֆիլմի դրվագներից մեկում:
Թանգարանային օրվան ընդառաջ՝ Մշակույթի նախարարությունը նաև պարգևատրման արարողություն էր կազմակերպել: Պարգևներ ստացան թանգարանային գիշերվա միջոցառումների կազմակերպման աշխատանքներին մասնակցած կամավորներ, մշակութային օջախների աշխատակիցներ:
«Սա ևս մեկ առիթ է՝ արժևորելու մեր թանգարանային ոլորտի մասնագետների և աշխատակիցների տքնաջան աշխատանքը, որի շնորհիվ այսօր մեր թանգարաններն այդքան ներկայանալի են, բոլորի կողմից սիրված և սպասված»,- ընդգծում է ժառանգության և ժողովրդական արհեստների վարչության պետ Աստղիկ Մարաբյանը։
Հավելենք, որ Հովհաննես Թումանյանի և Կոմիտասի 150-ամյակներով պայմանավորված՝ թանգարանային գիշերը նաև երկու հանճարներին նվիրված հատուկ միջոցառումներ կանցկացվեն: Մշակույթի նախարարությունում, սակայն, փակագծերը չեն բացում. այցելուների համար անակնկալ կլինի:
Նելլի Մելքոնյան
