30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
ԵՏՄ-ում միասնական արժույթի ներդրման անհրաժեշտություն չկա. Վալովայա
Քաղաքականություն
17.05.2019 | 14:39
Եվրասիական տնտեսական միությունում միասնական արժույթի ներդրման անհրաժեշտություն չկա: ՌԻԱ Նովոստիի փոխանցմամբ՝ նման կարծիք է հայտնել Եվրասիական տնտեսական հանձնաժողովի ինտեգրման և մակրոտնտեսության հարցերի նախարար Տատյանա Վալովայան:
«Մենք պետք է, անկասկած, ուսումնասիրենք եվրոպական փորձը, այդ թվում՝ սովորել նրանց սխալների վրա ու հասկանալ՝ որտեղ ենք տարբերվում իրարից: Մենք հիմա Եվրասիական տնտեսական միությունում միասնական արժույթի ներդրման ոչ մի անհրաժեշտություն չենք տեսնում, այն հիմա որևէ տնտեսական առավելության չի հանգեցնի»,- ասել է Վալովայան:
Նա, միաժամանակ, նշել է, որ հարկավոր է «ուժեղացնել արժութային-ֆինանսական և մակրոտնտեսական ոլորտներում փոխգործակցությունը»: «Երբ մենք խոսում ենք արժույթի, դրամական հաշվարկների մասին, թիվ մեկ խնդիրն ազգային արժույթների օգտագործման ընդլայնումն է»,- ասել է նախարարը:
Տատյանա Վալովայայի խոսքով՝ Ռուսաստան-Ղազախստան և Ռուսաստան-Բելառուս հարաբերություններում ազգային արժույթները զգալիորեն օգտագործվում են, իսկ ահա Ղազախստան-Ղրղզստան կամ Ղազախստան-Հայաստան հարաբերություններում հիմնականում օգտագործվում է ամերիկյան դոլարը:
«Մենք կարող ենք օգտագործել մեր ազգային արժույթները, դա կչեղարկի բազմաթիվ արժութային ռիսկեր: Բայց դա և՛ մակրոտնտեսական կայունություն, և՛ այլ տնտեսական պայմանների ստեղծում է պահանջում»,- հավելել է պաշտոնյան:
