Քաղաքականություն
17.05.2019 | 12:54ԱԺ ԲՀԿ խմբակցության պատգամավոր Տիգրան Ուրիխանյանն առաջարկում է դիվանագիտական անձնագրեր տրամադրել նաև մի շարք քաղծառայողների, որոնք արտերկրի հետ են աշխատում:
«Տարբեր պետական մարմիններում, գերատեսչություններում, այդ թվում՝ Ազգային ժողովում կան քաղծառայողներ, որոնք երկար տարիներ լրջագույն աշխատանք են կատարում՝ լուրջ դիվանագիտական կարողություններ դրսևորելով, բայց նրանք դիվանագիտական անձնագիր չունեն: Նրանք բազմաթիվ խնդիրներ են ունենում՝ տարրական կազմակերպչական հարցերից մինչև զուտ կարգավիճակից բխող գործառույթների իրականացման խնդիրներ: Ես խնդրում եմ սա դարձնել քննարկման առարկա և այդ մարդկանց տրամադրել դիվանագիտական անձնագրեր»,- արտաքին հարաբերությունների խորհրդարանական հանձնաժողովի այսօրվա նիստում ասաց պատգամավորը:
ԱԳ փոխնախարարն ասաց՝ խնդրին ծանոթ է, միաժամանակ մեջբերեց միջազգային փորձը. կա նաև ծառայողական անձնագրերի ինստիտուտ, որը հենց նման դեպքերի համար է, քանի որ դիվանագիտական անձնագրերի պարագան խստորեն կարգավորվում է Հայաստանի միջազգային պարտավորություններով:
«Այս պահի դրությամբ՝ մենք ավելի քան 40 երկրի հետ ունենք պայմանագրեր, որտեղ նշվում է հստակ թիվը և այն կատեգորիաները, որոնց տրվում են դիվանագիտական անձնագրերը: Ուստի փոխելը բավականին բարդ գործընթաց կլինի: Բայց կարող եմ առաջարկել ձեզ, որպես օրենսդիրներ, նախաձեռնել գործընթաց, որպեսզի մենք ունենանք նաև ծառայողական անձնագրերի ինստիտուտը, որը նույնպես պաշտոնական կարգավիճակ է տալիս պետական պաշտոնյաներին, այդ թվում՝ այն մարդկանց, ում մասին խոսեցիք»,- ասաց Գրիգոր Հովհաննիսյանը:
Հանձնաժողովի նախագահ Ռուբեն Ռուբինյանն իր հերթին հավելեց, որ երբ հեղափոխությունից հետո ուսումնասիրել են դիվանագիտական անձնագիր ունեցողների ցանկը, իր բնորոշմամբ՝ «խայտառակ պատկեր» են արձանագրել. «Անտրամաբանական մարդիկ ունեին դիվանագիտական անձնագրեր: Ընդ որում՝ պետք է շեշտել, որ օրենքը սպառիչ թվարկում է այն պաշտոնյաներին, որոնց հասնում է դիվանագիտական անձնագիր: Եվ բոլոր այն անձինք, որոնք այդ կատեգորիայի մեջ չէին, դիվանագիտական անձնագիր ստացել էին բացառության կարգով: Այս պահին նույնպես այն բոլոր անձինք՝ ներառյալ ձեր նշած անձինք, օրինակ՝ քաղծառայողներ, եթե պետք է ստանան դիվանագիտական անձնագրեր, դա պետք է լինի բացառության կարգով»:
Մանրամասները՝ տեսանյութում:
Շողիկ Գալստյան
