Արարատ Միրզոյանն առաջարկում է վարչապետի որոշ լիազորություններ փոխանցել կառավարությանը եւ խորհրդարանին

Ազգային ժողովի նախագահ Արարատ Միրզոյանը նախագիծ է հեղինակել, որով փոփոխություններ են նախատեսվում Ազգային ժողովի կանոնակարգ-սահմանադրական օրենքում:

Սահմանադրական օրենքում կատարվող փոխությունների արդյունքում որոշակիորեն կրճատվում են նաեւ վարչապետի լիազորությունները:

ԱԺ նախագահ Արարատ Միրզոյանի առաջարկած օրենսդրական փոփոխություններով նախատեսվում է Տնտեսական մրցակցության պետական պաշտպանության հանձնաժողովի եւ Հանրային ծառայությունները կարգավորող հանձնաժողովի նախագահի լիազորությունները դադարելուց կամ դադարեցվելուց հետո հանձնաժողովի նախագահի թափուր պաշտոններում թեկնածու առաջադրելու իրավունքը վերապահել կառավարությանը:

Հիշեցնենք, որ այս պաշտոնների համար թեկնածու առաջադրում է վարչապետը, որն էլ ընտրվում է Ազգային ժողովում:

Խորհրդարանի նախագահի առաջարկած օրենսդրական նախագծերի փաթեթում փոփոխություններ են նախատեսվում նաեւ «Տնտեսական մրցակցության պաշտպանության մասին» եւ «Հանրային ծառայությունները կարգավորող մարմնի մասին» օրենքներում:

Այս նախագծերի ընդունման դեպքում կընդլայնվեն խորհրդարանական խմբակցությունների լիազորությունները:

Մասնավորապես, իշխող եւ ընդդմադիր խմբակցությունները կունենան հնարավորություն Տնտեսական մրցակցության պետական պաշտպանության եւ Հանրային ծառայությունները կարգավորող հանձնաժողովների թափուր անդամների համար թեկնածուներ առաջադրել:

Նշենք, որ Արարատ Միրզոյանի հեղինակած նախագիծը հրապարակված է Ազգային ժողովի պաշտոնական կայքում:

Նարեկ Կիրակոսյան