11.07.2026 | 23:11
Լինդա Նոսկովան՝ «Ուիմբլդոնի» չեմպիոն. ՏԵՍԱՆՅՈՒԹ
Անօթևանությունն ու աղքատությունը գլխավոր հիմնախնդիրներ․ Շիրակի մարզպետը ամփոփել է պաշտոնավարման 100 օրը
Քաղաքականություն
16.05.2019 | 22:12
Այսօր Շիրակի մարզպետ Տիգրան Պետրոսյանն ամփոփել է իր պաշտոնավարման 100 օրը։ Մարզպետը ասուլիսում ներկայացրել է անցած ժամանակահատվածում կատարված աշխատանքներն ու խոսել տարբեր հիմնախնդիրներից։
Վերջինիս համոզմամբ՝ անօթևանությունն ու աղքատությունը շարունակում են մնալ Շիրակի մարզի առաջնային մարտահրավերները։
«Անօթևանությունը մեր մարզի ամենացավոտ խնդիրն է: Այսօր սոցիալական առումով ամենածանր դեպքերը հենց անօթևանության հետ կապ ունեն: Ես բնակիչների հետ անմիջական շփումների, քաղաքացիների ընդունելությունների ժամանակ, երբ տարբեր խնդիրներից եմ լսում, հավատացեք՝ բոլոր ծայրահեղ դեպքերը հենց անօթևանության մասով են: Պետությունն այսօր կամք ունի հարցին մոտենալու, և որպես այդ կամքի դրսևորման առաջին պայման այն աշխատանքներն են, որոնք իրականացվում են»,- ասել է Տիգրան Պետրոսյանը։
Մարզպետը նաև տեղեկացրել է, որ վարչապետի հանձանարարությամբ ստեղծված հանձնախումբը իրականացնել է քարտեզագրման աշխատանքներ։ Շիրակի մարզի 19 համայնքում 3517 ժամանակավոր կացարան է գույքագրվել, որոնցից միայն 2858-ը՝ Գյումրիում։ Շիրակի մարզպետը խոսել է նաև ներդրումային ծրագրերից և ընգծել, որ աշխատանքներ են տարվում մարզում սոցիալ-տնտեսական վիճակը բարելավելու ուղղությամբ:
«Ինձ համար ուրախալի է, որ տեքստիլ արդյունաբերության ոլորտում դրական տեղաշարժ կա և նոր ծրագրեր են կյանքի կոչվում: Խոսքն ինչպես Մարալիկի մանվածքային գործարանի, այնպես էլ Գյումրիում ջինսերի արտադրության և մի շարք այլ նախաձեռնությունների մասին է»,- ասել է Տիգրան Պետրոսյանը:
Ի դեպ՝ հուլիսին էլ Գյումրիում նախատեսվում է իրականացնել ներդրումային ֆորում, որին կներկայացվի 100 գաղափար ներառող Շիրակի մարզի բիզնես փաթեթը։
Էմմա Չոբանյան
