11.03.2026 | 23:28
Իրանի սպորտի նախարարը հայտարարել է, որ երկիրը չի մասնակցի ֆուտբոլի աշխարհի առաջնությանը
Վիզաների ազատականացման հարցը մեր օրակարգի կարևորագույն կետերից է. ԱԳ նախարար
Քաղաքականություն
15.05.2019 | 11:41
Եվրամիության հետ վիզաների ազատականացումը մեզ համար շատ կարևոր, շատ սկզբունքային հարց է: Բրյուսելում լրագրողների հետ զրույցում նշեց ՀՀ ԱԳ նախարար Զոհրաբ Մնացականյանը:
«Վիզաների ազատականացումն այն կարևորագույն գործիքն է, որը հնարավորություն է տալիս մեզ ամրապնդելու այն, ինչը կոչվում է մարդկային մարդկային շփում: Սա միակ գործիքը չէ, որովհետև մենք ուշադրություն ենք դարձնում և փորձում ենք զարգացնել բոլոր մյուս հնարավորությունները, որոնք վերաբերում են կրթական, մշակութային, գիտական, գործարար և այլ շրջանակներում մերձեցնելու մեր քաղաքացիներին այս մայրցամաքում իրենց գործընկերների հետ: Վիզաների ազատականացումը հսկայական նշանակություն ունի»,- ասաց նախարարը:
Զոհրաբ Մնացականյանը նշեց, որ կան տարբեր նկատառումներ, տարբեր հարցեր, որոնք վերաբերում են միգրացիայի հանդեպ վերաբերմունքին և քաղաքականությանը՝ հավելելով, որ մեզ համար սա բավարար խոչընդոտ չէ:
«Մենք չենք կարող դա ընդունել և ասել՝ շատ լավ, հարցը փակվեց: Իհարկե՝ չփակվեց, և մենք շարունակելու ենք շատ հետևողականորեն տանել առաջ այն, որովհետև պնդում ենք, որ յուրաքանչյուրը գնահատվում է ըստ իր արժանիքների, ըստ իր կարողությունների: Մենք շատ զգայուն ենք և որևէ կերպ չենք գործելու այնպես, որպեսզի ստեղծենք ազատականացված ռեժիմի չարաշահում։ Հիմա մեզ ասում են, որ կան մյուս երկրները, որոնք օգտվում են ազատականացված ռեժիմից և չարաշահում են, դա մեզ համար դա բավարար փաստարկ չէ: Մենք ուզում ենք գնահատված լինել մեր արժանիքների»,- նշեց նա:
Վիզաների ազատականացման հարցով երկխոսության մեկնարկի հստակ ժամկետ, սակայն, ԱԳ նախարարը չնշեց. «Մեզ համար սա յուրաքանչյուր պահի հարց է, չափազանց մեծ գերակայություն է: Երբ կլինի՝ չեմ կարող ասել, բայց հարցը մեր օրակարգի ամենակարևոր կետերից է»:
