02.09.2026 | 23:08
31 տեսախցիկ, 48 նոր ավտոմեքենա և ուսումնաարտադրական կենտրոններ․ Սրբուհի Գալյանը ներկայացրել է բարեփոխումները
Փաշինյան-Ալիև հաջորդ հանդիպումն ակնկալվում է Վաշինգտոնում. Զոհրաբ Մնացականյանը հաստատում է
Քաղաքականություն
15.05.2019 | 11:18
Մի փոքր էլ համբերենք, մենք սպասում ենք որոշ հստակեցումների՝ հաջորդ փուլի համար: Բրյուսելում Արևելյան գործընկերության 10-ամյակին նվիրված Բարձր մակարդակի համաժողովից հետո լրագրողների հետ զրույցում պատասխանելով Նիկոլ Փաշինյանի և Իլհամ Ալիևի հաջորդ հանդիպման հնարավորության մասին հարցին՝ ասաց ՀՀ ԱԳ նախարար Զոհրաբ Մնացականյանը:
«Հյուրընկալող կողմը պետք է ասի՝ ինչպես է հնարավոր, երբ է հարմար, որպեսզի մենք նույնպես կարողանանք գնահատել այդ ժամկետները, այսինքն՝ համաձայնել։ Սկզբունքորեն մենք, բնականաբար, որևէ խնդիր չունենք»,- հավելեց նա:
Հարցին՝ հստա՞կ է, որ Վաշինգտոնն է հյուրընկալելու Հայաստանի և Ադրբեջանի ղեկավարներին, նախարարը պատասխանեց. «Ակնկալվում է, բայց սխալ կլինի որևէ բան ասել։ Նորից եմ կրկնում՝ հյուրընկալող կողմից առաջ ընկնելը, կարծում եմ, սիրուն բան չէ»:
Դիտարկմանը, որ Ադրբեջանի ԱԳ նախարարը կրկին պնդել է, որ սկբունքորեն դեմ են բանակցային սեղան Արցախի վերադարձին, Զոհրաբ Մնացականյանն արձագանքեց. «Մենք էլ սկզբունքորեն կողմ ենք: Մենք բազմիցս առնչվել ենք այս հարցին: Սա խստորեն պրակտիկ հարց է, որովհետև եթե Լեռնային Ղարաբաղին չի տրվում հնարավորություն սեփականատերը լինել այս գործընթացի, դրա արդյունավետությունը լրջորեն տուժում է: Մեր մոտեցումը շատ գործնական է և տրամաբանական»:
