Տեսանյութեր
14.05.2019 | 14:39«Ես «Հովեր» երգչախմբի ղեկավարն եմ եղել, ինչպես բոլոր կոլեկտիվները՝ «Վիվասել ՄՏՍ»-ի կողմից ունեցել են ֆինանսական աջակցություն, որը կազմակերպվել է «Լույս» հիմնադրամի միջոցով: Սա է իմ առնչությունը եղել: Շուշիում երեք օպերա եմ բեմադրել, սա է եղել իմ առնչությունը: Մարդ չեմ լինի, եթե չասեմ՝ շնորհակալ եմ «Հովերի» նկատմամբ նման վերաբերմունքից»,- Factor.am-ի հետ զրույցում այս մասին ասաց Կոմիտասի անվան պետական կոնսերվատորիայի ռեկտորի պաշտոնակատար, ռեկտորի թեկնածու Սոնա Հովհաննիսյանը՝ պատասխանելով հարցին, թե ի՞նչ կապ ունի Սերժ Սարգսյանի տիկին Ռիտա Սարգսյանի հետ:
«Ես մշակույթի գործիչ եմ, մշակույթի ոլորտն ապաքաղաքական է, ով էլ ղեկավարի «Հովեր» երգչախումբը, այն մնում է «Հովեր» երգչախումբ: Որևէ մեկը չպետք է մեղադրական սյունին գամվի, որովհետև մեր աշխատանքի արդյունքում է, որ ունենք վաստակավորի կոչումներ: Վաստակավոր մարդկանց սևացնելը ես անբարոյական եմ համարում»,- ասաց նա:
Հստակեցնող հարցին՝ այս պահին շփում չունի՞ տիկին Սարգսյանի հետ, Սոնա Հովհաննիսյանն ասաց. «Այժմ ոչ մի կապ չունեմ, ցավոք: Ցավոք, որովհետև նախկինում իր լավ տրամադրվածությունը, որ մեր երգչախումբը ունենար լրավճարներ, որ կարողանար շնչեր… Ես չեմ հերքում իմ առնչությունը, ես ոտքից գլուխ շնորհակալ եմ»: Հիշեցնենք, որ երբ Սոնա Հովհաննիսյանը նշանակվեց ռեկտորի պաշտոնակատար, ՔՊ-ի մեր աղբյուրները փոխանցեցին, որ կուսակցականների սրտով չէ Ռիտա Սարգսյանի մտերմին այդ պաշտոնը վստահելը:
Հավելենք, որ կոնսերվատորիայում շարունակվում են ռեկտորի ընտրությունները: Մեծ է հավանականությունը, որ կընտրվի հենց Սոնա Հովհաննիսյանը: Մյուս թեկնածուն բուհի պրոռեկտոր Վաղարշակ Հարությունյանն է:
Մանրամասները՝ տեսանյութում:
Նարեկ Կիրակոսյան
