«Կարող է ընկալվել մեսիջ». կոնսերվատորիայի խորհրդի նախագահը՝ Արայիկ Հարությունյանի գրառման մասին. ՏԵՍԱՆՅՈՒԹ

Երևանի Կոմիտասի անվան պետական կոնսերվատորիայի ռեկտորի ընտրությունները որոշվեց դռնփակ անցկացնել: Նման որոշում կայացրեց բուհի խորհուրդը:

Factor.am-ի հարցին՝ ի՞նչն է պատճառը, խորհրդի անդամները պատասխանեցին, որ առաջնորդվում են կանոնակարգով: Մեր դիտարկմանը, որ նախորդ ընտրությունները բաց էին, պատասխանեցին. «2007 թվականին ընդունված ընթացակարգի համաձայն՝ ռեկտորի ընտրության խորհրդի նիստը փակ է»:

Հիշեցնենք, որ թեկնածուները երկուսն են՝ պրոռեկտոր Վաղարշակ Հարությունյանը և ռեկտորի ժամանակավոր պաշտոնակատար, «Հովեր» երգչախմբի հիմնադիր Սոնա Հովհաննիսյանը:

Տեղեկացրել էինք, որ կոնսերվատորիայի որոշ ուսանողներ ի աջակցություն Սոնա Հովհաննիսյանի ակցիա են իրականացնում: Factor.am-ը խորհրդի կառավարման ղեկավար Լիլիթ Երնջակյանից հետաքրքրվեց՝ արդյո՞ք ուսանողների կազմակերպած ակցիան կարող է խորհրդի որոշման վրա ազդել: «Ո՛չ: Դա ուսանողների ինքնաբուխ նախաձեռնությունն է, կարծիք են հայտնում: Ես այդ մասին չգիտեի, ձեզանից տեղեկացա»,- ասաց Լիլիթ Երնջակյանը:

Սոնա Հովհաննիսյանին կոնսերվատորիայի ռեկտորի պաշտոնակատար նշանակելիս ԿԳ նախարար Արայիկ Հարությունյանը Ֆեյսբուքի իր էջում դրական կարծիք էր հայտնել նրա մասին՝ Հովհաննիսյանի նշանակումը որակելով լավագույն փոփոխություն: Factor.am-ը Լիլիթ Երնջակյանից հետաքրքրվեց՝ արդյո՞ք սա մեսիջ է խորհրդի անդամների համար, ինչին Երնջակյանը պատասխանեց. «Կարող է ընկալվել և՛ մեսիջ, և՛ անձնական կարծիք: Դա այստեղ քննարկելու խնդիր չէ»:

Մանրամասները՝ տեսանյութում:

Նարեկ Կիրակոսյան