16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
«Թուրքիան S-400 համակարգերի հարցում հետքայլ է անում». Bild
Քաղաքականություն
13.05.2019 | 17:39
Գերմանական «Bild» պարբերականի հոդվածում պնդում է արվել որ Թուրքիան հետաձգելու է ռուսական S-400 համակարգերի գնման գործընթացը: Թերթը, հղում անելով մի անանուն թուրք բարձրաստիճան դիվանագետի, գրել է, որ ռուսական ՀՕՊ համակարգերը Թուրքիային չեն մատակարարվի հուլիս ամսին, ինչպես ավելի վաղը հայտարարել էր նախագահ Ռեջեփ Թայիփ Էրդողանը: Դիվանագետը նշել է, որ մատակարարման՝ անորոշ ժամանակով հետաձգման պատճառը Թուրքիայի տնտեսության մեջ առկա ճգնաժամն է, որն ավելի է խորանում Էրդողանի վարած ագրեսիվ արտաքին քաղաքականության հետևանքով. գրում է ermenihaber-ը:
«Մատակարարումը կհանգեցնի Վաշինգտոնի կողմից Անկարայի դեմ պատժամիջոցների կիրառմանը, ինչն էլ թուրքական լիրայի ներկա արժեզրկման պայմաններում կարող է հանգեցնել երկրի տնտեսության քայքայման»,- գրում է թերթը՝ մեջբերելով անունը հայտնելչցանկացած թուրք դիվանագետի խոսքերը:
Այդ պնդումները, սակայն, հերքել է Թուրքիայի նախագահականի հանրային կապերի ղեկավար Ֆահրեթթին Ալթունը:
Վերջինս «Bild»-ի խմբագրին ուղղված իր tweet-ում մասնավորապես գրել է. «Հարգելի Ջուլիան Ձեր աղբյուրները սխալվում են: S-400-ների գնման պայմանագիրն արդեն իրագործված է»:
Նշենք, որ ռուսական «S-400» ՀՕՊ համակարգերի գնման թեման ՆԱՏՕ-ի անդամ երկու դաշնակից երկրների՝ ԱՄՆ-ի ու Թուրքիայի հարաբերություններում ճգնաժամի առաջացման պատճառ է դարձել:
ԱՄՆ-ն անցանկալի է համարում Թուրքիայի կողմից ռուսական համակարգերի գնումը՝ Անկարային հորդորելով հրաժարվել այդ գործարքից: ԱՄՆ-ի բազմաթիվ պաշտոնյաներ բազմիցս հայտարարել են, որ գործարքից չհրաժարվելու դեպքում Անկարան կարող է հայտնվել Վաշինգտոնի պատժամիջոցների թիրախում, որոնք կարող են արտահայտվել ընդհուպ մինչև ամերիկյան նոր սերնդի F-35 կործանիչների ծրագրից Թուրքիային դուրս թողնելով:
Թուրքիան էլ բարձրաստիճան պաշտոնյաների մակարդակով քանիցս հայտարարել է, որ գործարքն արդեն կայացած է և իրենք ոչ մի դեպքում չեն պատրաստվում հրաժարվել դրանից:
