Նիկոլ Փաշինյանը՝ հեղափոխության համար ծախսված գումարի չափի և ամենակարևոր ձեռքբերման մասին

2018 թվականին Հայաստանում իրականացված հեղափոխությունը «պրագմատիզմի նկատմամբ ռոմանտիզմի հաղթանակն էր»: ՌԲԿ-ին տված հարցազրույցում այս մասին ասել է ՀՀ վարչապետ Նիկոլ Փաշինյանը՝ միաժամանակ հավելելով, որ հեղափոխության համար գումար, ամեն դեպքում, ծախսվել է:

«Մենք հեղափոխության համար 200 հազար դոլար ենք ծախսել: Որտեղի՞ց են այդ գումարները… մարդկանցից ենք խնդրել: Մենք էլեկտրոնային դրամապանակ ունեինք, և բոլոր երկրներից հայերը, ընդ որում մեծ մասը՝ Ռուսաստանից, մեզ գումար էին նվիրում: Մենք ծախսում էինք այդ գումարը, և հեղափոխության ընթացքում ամեն շաբաթ հրապարակում, թե ինչքան ենք ծախսել և ինչի համար»,- պատմել է Փաշինյանը: Որպես հեղափոխության հաղթանակի ևս մեկ կարևոր պայման վարչապետը նշել է սոցցանցերի գործոնը:

«Երբ 2012 թվականին ես պատգամավոր դարձա, շատ ակտիվ էի: Մինչ այդ բանտում էի: Այն ժամանակ սոցցանցեր չկային: Երբ դուրս եկա բանտից, տեսա, որ կա Յութում, Ֆեյսբուք, Թվիթեր: Ես հասկացա, որ ընդդիմադիր գործչի համար դա հնարավորություն է՝ օգտագործել շփման այդ միջոցը: Երբ պատգամավոր դարձա, իմ ելույթները հրապարակում է Facebook-ում և YouTube-ում: 2016 թվականին իմ բոլոր ելույթների դիտումները միասին 10-15 մլն էին: Աշխարհում 10 մլն հայ կա: Դա նշանակում է, որ տեսականորեն յուրաքանչյուր հայ գոնե մեկ անգամ դիտել է իմ ելույթը»,- ասել է Նիկոլ Փաշինյանը: Իսկ մեկ տարվա ընթացքում հեղափոխության ամենակարևոր ձեռքբերումը Նիկոլ Փաշինյանը համարում է ժողովրդավարությունը:

«Անցյալ տարի մեզ մոտ արտահերթ խորհրդարանական ընտրություններ անցկացվեցին: Եվ դրանք միակն էին մեր երկրի պատմության մեջ, որի պաշտոնական արդյունքները չվիճարկվեցին Սահմանադրական դատարանում»,- նշել է նա: