Քաղաքականություն
10.05.2019 | 13:32Կառավարության այսօրվա նիստում ԱԱԾ տնօրեն Արթուր Վանեցյանն առաջարկեց նիստի օրակարգից հանել «Ինտեգրված կադաստրի ստեղծման հայեցակարգը և հայեցակարգից բխող միջոցառումների ծրագիրը հաստատելու մասին» որոշման նախագիծը: Ասաց՝ այն չի ուղարկվել Ազգային անվտանգության ծառայությանը՝ ուսումնասիրելու և կարծիք ստանալու:
«Բայց նախնական ուսումնասիրության արդյունքում երևում է, որ այս որոշման ընդունման դեպքում կուտակվելու են մի սերվերում տվյալներ, որոնք շատ գաղտնի են և պարունակելու են մեր երկրի, եթե ավելի կոնկրետ ասենք՝ գետնի վրա, գետնի տակ եղած ողջ ինֆրաստրուկտուրան, ընդերքը, ինչպես նաև, ամենակարևորը, կոորդինատները: Եվ պարզ չէ, թե այդ տեղեկությունները մենք ինչպես ենք պաշտպանելու, ինչպես են պահպանելու դրանց արտահոսքը, ինչպես նաև պարզ չէ այս տվյալներից օգտվողների ցանկը»,- ասաց Արթուր Վանեցյանը:
Ի պատասխան՝ Անշարժ գույքի կադաստրի կոմիտեի ղեկավար Սարհատ Պետրոսյանն ասաց՝ այսօր հայեցակարգն է քննարկվում, ոչ թե համակարգ ստեղծելը:
«Մինչև համակարգը ստեղծելը, կարծում եմ, նվազագույնը մեկ տարի ժամանակ ունենք, պարոն Վանեցյան, և ձեզ հետ միասին կփորձենք բոլոր ռիսկերը նվազեցնել: Ինչո՞ւ ձեզ չի ուղարվել, որովհետև շահագրգիռ այն մարմինները, որոնք համարվում են տարածքային կառավարման և միջավայրի կոմիտեության անդամ, իրենց ենք ուղարկե»,- ասաց Պետրոսյանը:
Վարչապետն իր հերթին ասաց, որ եթե հայեցակարգային մակարդակում ազգային անվտանգության հետ առնչվող հարց կա, ճիշտ է հենց այս մակարդակում քննարկել, որ հետո թյուրըմբռնումներ չլինեն: Հայեցակարգի հարցը, ի վերջո, հանվեց նիստի օրակարգից:
Մանրամասները՝ տեսանյութում:
Շողիկ Գալստյան
