Գազի գինը փոխողները խոստովանում են, որ նախկինում խաբե՞լ են. Նիկոլ Փաշինյան. ՏԵՍԱՆՅՈՒԹ

Գազի գնի հետ կապված օրենսդրական նախաձեռնությունը քննարկելիս մենք մի քանի անգամ արձանագրել ենք, որ դա անում ենք սպառողների շահերի պաշտպանության համար, և հավաստիացումներ ենք ստացել տարբեր բանաձևերով, որ դա չի կարող ազդել միավոր գազի վաճառքի գնի վրա: Կառավարության այսօրվա նիստում այս մասին ասաց վարչապետ Նիկոլ Փաշինյանը և Շուկայի վերահսկողական տեսչական մարմնի ղեկավարից ուսումնասիրության տվյալներ խնդրեց:

Արմեն Կոտոլյանը նշեց, որ ներկայում հանրապետությունում գազի գինը տատանվում է 255-310 դրամի սահմաններում:

«Նախկինում՝ խ.մ.-ով վաճառքի դեպքում, երբ գազը վաճառվում էր 200 դրամով, կիլոգրամի փոխվելու դեպքում պետք է վաճառվեր 272 դրամ, բայց այսօր որոշ տնտեսվարողներ գազի գինը հասցրել են 310 դրամի: Այս հարցի շուրջ զրուցեցի ՊԵԿ-ից պարոն Մաշադյանի հետ, ով բացատրեց, որ նախկինում տնտեսվարողները հնարավորություն են ունեցել չարաշահումների միջոցով գինը ցածր պահել, այսինքն՝ գինը գրված է եղել 200 դրամ, բայց իրականում այն եղել է 222 դրամ, այսինքն՝ թերլիցքավորման արդյունքում հնարավորություն են ունեցել ցածր գին ներկայացնել: Այսօր այդ հնարավորությունը չունենալու պատճառով տնտեսվարողները ստիպված են եղել գին բարձրացնել: Այսինքն՝ սպասվելիք 270-280 դրամի փոխարեն գինը հասել է 300-310 դրամի»,- պարզաբանեց Արմեն Կոտոլյանը:

Վարչապետը ֆինանսների նախարարից հետաքրքրվեց՝ «համոզվա՞ծ ենք, որ ճիշտ բանաձև ենք կիրառել, ընդամենը նույն խ.մ.-ը տրանսֆորմացրել ենք կիլոգրամի»:

«Այո՛, բայց ոչ թե գազի արժեքին է վերաբերել փոփոխությունը, այլ ակցիզային հարցին: Այսինքն՝ մենք հարկի մասն ենք սահմանել այնպիսին, որը կլորացվել է դեպի ներքևի կողմ: Հետևաբար՝ խոսքը վերաբերել է միայն չափման միավորի փոփոխությանը, ոչ թե գումարի: Եթե ելնում ենք նրանից, որ նախկին որևէ չարաշահում չի եղել, չէր կարող գինը փոխվել»,- պարզաբանեց Ատոմ Ջանջուղազյանը:

Մանրամասները՝ տեսանյութում:

Շողիկ Գալստյան