Քաղաքականություն
09.05.2019 | 11:51Երբ վարչապետն ասում է՝ ժողովուրդն է պատասխանատու, պատկերացնում եք, որ ժողովո՞ւրդը պիտի գնա բանակցի:
Այսօր Հաղթանակի զբոսայգում լրագրողների հետ զրույցում ասաց ՀՀ ԱԳ նախարար Զոհրաբ Մնացականյանը՝ պատասխանելով Factor.am-ի հարցին, թե վարչապետը պարբերաբար ասում է, որ ԼՂ կարգավորման հարցում պետք է նաև ժողովրդի տեսակետը հասկանալի լինի, Կառավարությունն ինչպե՞ս է պատկերացնում բանակցություններում ժողովրդի ներգրավումը:
«Եթե դուք այդպես եք հասկանում, սխալ եք հասկանում: Երբ վարչապետն ասում է՝ ժողովուրդն է պատասխանատու, պատկերացնում եք, որ ժողովո՞ւրդը պիտի գնա բանակցի: Կա Կառավարություն, Կառավարությունն ունի իր մանդատը: Մանդատը տրված է ժողովրդի կողմից՝ ընտրությունների միջոցով: Կառավարությունը չի կարող անել որևէ բան, որը կխախտի մանդատը»,- հավելեց նախարարը:
Հստակեցնող հարցին՝ Կառավարությունն ինչպե՞ս է պարզելու ժողովրդի տեսակետը, Զոհրաբ Մնացականյանն ասաց. «Մենք դեռևս այդ փուլում չենք: Բայց մենք չունենք ձևեր՝ հասկանալու, թե ինչպես է աշխատում մեր հասարակական կարծիքը: Մեր հասարակության մեջ՝ առավել ևս, հասարակություն, որն ինստիտուցիոնալ առումով շատ ավելի զարգացած է, քան մեզ թվում է, շատ ավելի զարգացած է, որպեսզի մենք կարողանանք տեսնել արտահայտումը ժողովրդի կամքի»:
ԱԳ նախարարը հավելեց նաև, որ վարչապետը խոսում է սկզբունքի մասին: «Որովհետև հաճախ եղել են իրավիճակներ, երբ ենթադրություն է եղել, որ ինչ-որ գործընթաց է գնում, որը կարող է ժողովրդից կտրված լինել: Մեր հասարակության մեջ, մեր երկրի մեջ Կառավարությունն արտահայտում է ժողովրդի կամքը»,- ասաց Զոհրաբ Մնացականյանը:
Առաջիկայում վարչապետ Նիկոլ Փաշինյանը Բրյուսելում է լինելու: Մեր հարցին՝ հնարավո՞ր է հանդիպում Ադրբեջանի նախագահի հետ՝ Զոհրաբ Մնացականյանը պատասխանեց, որ հանդիպում ծրագրված չէ:
Մանրամասները՝ տեսանյութում:
Շողիկ Գալստյան
