Ո՞վ ունի բարոյական իրավունք ինձ մեղադրելու Արցախը ծախելու մեջ․ վարչապետ. ՏԵՍԱՆՅՈՒԹ

Եթե ես Սերժ Սարգսյանի հետ հանդիպելու անհրաժեշտություն ունենամ, կհանդիպեմ և ժողովրդին դրա մասին տեղյակ կպահեմ: Այսօր հրավիրված մամուլի ասուլիսում ասաց ՀՀ վարչապետ Նիկոլ Փաշինյանը՝ պատասխանելով Արցախում, որտեղ լինելու է և՛ ինքը, և Սերժ Սարգսյանը, վերջինին հանդիպելու հավանականության մասին հարցին:

«Ձեր կարծիքով՝ ես Սերժ Սարգսյանի հետ շփվելո՞ւ եմ: Երբ ինձ պետք լինի Սերժ Սարգսյանի հետ խոսել, ես կխոսեմ: Այնպիսի տպավորություն է, որ ինչ-որ մարդիկ որոշում են, որ ես պետք է Սերժ Սարգսյանի հետ հանդիպեմ: Ես կորոշեմ՝ նրա հետ հանդիպե՞մ, թե՞ չէ: Սերժ Սարգսյանը չի կարող որոշել՝ ինձ հետ հանդիպե՞լ, թե՞ չէ, բայց ես կարող եմ որոշել: Պա՞րզ է այս ամեն ինչը»,- նշեց Փաշինյանը:

Նա, միաժամանակ, վերահաստատեց իր հայտարարությունը, որ Արցախի հարցով ժողովուրդը պետք է որոշում կայացնի. «Ամեն ինչ պետք է ժողովուրդը որոշի: Համակերպվե՛ք: ՀՀ-ում ամեն ինչ որոշելու է ժողովուրդը՝ Հայաստանում օրենսդրությամբ սահմանված կարգով: Եթե ես բանակցությունների արդյունքում ունենամ այնպիսի լուծում, որ համարեմ՝ դա արժանի է ներկայացնել ժողովրդին, կգամ, կհրավիրեմ՝ հնարավոր է՝ հանրահավաք, հնարավոր է՝ ասուլիս, հնարավոր է՝ տեսաուղերձ, և կասեմ՝ այսպիսի տարբերակ կա, ժողովուրդ ջան, դուք թույլ տալի՞ս եք այս շրջանակում բանակցել»:

Ըստ Նիկոլ Փաշինյանի՝ արցախյան հիմնախնդրի հետ կապված ամենակարևորն է՝ ձևակերպել, թե ինչ ենք ուզում: «Եկեք հստակ ձևակերպենք և ասենք՝ վարչապե՛տ, սա է քո խնդիրը: Գնում ենք բանակցությունների, գրում են՝ ծախեցին հողերը: Ծախողը դուք եք: Ո՞վ բարոյական իրավունք ունի ինձ որևէ բան ծախելու մեջ մեղադրի»,- ասաց նա:

Մանրամասները՝ տեսանյութում:

Ռոբերտ Անանյան